Kynmaw u Lat thymmai ïa ka Shillong kum ka ktem ha ka thma Pakistan

Shillong, Risaw 04 : U Brigadier (Dr) BD Mishra ha ka sngi Ba-ar u la shim smai kum u Lat ba thymmai jong ka jylla.
Ïa utei u Lat la pynbam smai da u Nongbishar jong ka Meghalaya High Court, Bah HS Thangkhiew ha ka jingïalang kaba long ha Raj Bhavan.
Ha katei ka jingpynsmai la donlang ruh naduh u Lamphang ka Iing Dorbar Thawain ka jylla, Bah Metbah Lyngdoh, ki Myntri sorkar kynthup naduh u Bah Banteidor Lyngdoh, Bah Hamletson Dohling, Bah Lahkmen Rymbui kynthup naduh ki MLA kum u Saleng A Sangma, Pynïaid Sing Syiem, nangta u Chief Secretary ka Jylla Bah DP Wahlang bad ruh u DGP ka jylla u Dr. LR Bishnoi nalor kiwei kiwei.
U Dr. Mishra uba dei ruh u Lat jong ka Arunachal Pradesh u la shimti ban peit lang kum u Lat ka Meghalaya ha jaka jong u Satya Pal Malik, uba ka samoi treikam ka la kut noh ha kane ka sngi.
Hadien ba u la shimti kum u Lat ba thymmai, u Dr. Mishra u la pynkynmaw ruh ba kumno ka Shillong mynshwa kadei ka ktem ha ka por ba don ka thma ha u snem 1971. “Ngi la shim bynta ha katei ka thma bad ngi la pynrem ïa ka Pakistan,” u la ong.
Nalorkata, u Lat u la kren bad ïaroh ruh ïa ki nongshong shnong ka nongbah Shillong bad ka jingkhuid jong ka. “Kadei ka jaka kaba itynnad shisha, ki briew kiba sngewtynnad, leh khuid bad nga da itynnad shisha bad kumta nga ai khublei ïa baroh ki nongshong shnong ka Shillong bad ka jylla hi baroh kawei,” u la ong.
U Dr. Mishra un bteng ban bat kum u Lat ka Meghalaya haduh ba la pynbeit noh da kumwei pat, ong ka kyrwoh ba pyllait na ka Rastrapati Bhavan.
Kumban shu kdew hangne, u Dr. Mishra u la shongthait noh na ka kam shipai ha ka 31tarik u Naitung 1991 kum u Brigadier hadien ka jingshakri kaba la neh slem bha naduh ba u rung sha katei ka kam shipai ha ka 17tarik Nohprah 1961.
Ki kam kiba u Dr. Mishra u bat sha shwa ban shimti kum u Lat ki kynthup naduh ka kyrdan Commander ka NSG (Black Cat Commandos) Counter Hijack Task Force bad u la ïoh ruh ban pdiang ïa ka khusnam na u Myntri Rangbahduh ka Ri namar ka jingïakhun borbah jong u ban pyllait im ïa ki 124 ngut hadien ba ka liengsuiñ ba ki shong ka la shah rahbor.