Nongstoiñ, Naitung 21: Ka long kaei kaei kaba kyndit ïa kiba bun ba lang khamtam ki longkmie longkpa ba ha ka dong ka thaiñ Mawthadraishan, u drok u la ïoh ban bsuh khlieh. Dang ha ka janmiet jong ka sngi saitjaiñ ba la dep, ka HYC Mawthadraishan Circle ka la ïoh ban bat bad kurup ïa u drok na uwei u samla jong katei ka dong ka thaiñ.
Ka jingïoh ban kurup drok ka HYC ka dei ryngkat lang ka jingïatreilang bad kiba haïing jong utei u samla (ba la buhrieh kyrteng) u ba la kyrni ha u drok. Hadien ba ki la ïoh ban kurup, na ka liang ka Seng HYC ka la thang ingkhong khait syndon ïa u drok bad ki thyrnia injek.
Ka Seng ha ka jingïalam jong u samla Shembor Langrin President HYC Mawthadraishan, ka la ïoh ruh ban ïa syllok bad kiba haïing hasem bad ïa utei u samla. Kumjuh ruh ka la ïarap ruh ïa katei ka ïing ka sem, ha ka ban phah sumar noh ïa utei u samla sha ki jaka sumar lane Rehab Centre.
Na ka liang ka HYC Mawthadraishan Circle ka kyrpad ïa ki nongïalam shnong, ki seng trei mon sngewbha, khamtam eh ïa ki bor jong ka aiñ, ba kim dei ban kheiñ sting. Hynrei, ban peitngor hapoh ka thaiñ Mawthadraishan bad ka Distict Eastern West Khasi Hills hi baroh kawei, khnang ba u drok um ïoh ban rung hapoh ka thaiñ.
