Nongstoiñ, Jylliew, 24: Ka jingdon jong ka surok na Kampahduli sha Mawsikar kaba dei ka surok ba la shna da ka sorkar Assam, ka la pynlong ïa ki bar jylla ba kin ïoh rung lait luid sha West Khasi Hills bad kiwei kiwei ki bynta hapoh ka jylla
Halor kane ki nongïalam ka Hynñiewtrep Integrated Territorial Organisation jong ka West Khasi Hills District, lyngba u bah S.P.Mawlieh uwei na ki nongïalam ba hakhmat jong ka seng, u la ong ba ha ka 20 tarik mynta u bnai ki nongïalam ka seng hadien ba ki la ïoh jingtip ba ki don ki bar jylla kiba wan rung sha West Khasi Hills lyngba katei ka surok Kamphaduli Mawsikar, ki la leit ban pynap shrip ha Mawbyrngem ka shnong kaba don ha khmat ka shnong Rwiang, ha kaba ki la ïoh ban bat ïa khatsan ngut ki bar jylla ki ba dang wan da ki lai tylli ki kali maruti.
Utei u nongïalam ka seng u la ong ruh ba hadien ba ki la ïoh ban bat, ki la pynlong ka jingtohkit ha kaba kitei ki bar jylla ki la ïathuh ba ki thmu ban leit trei sha kawei ka karkhana thang dewïong kaba don ha Nongjri South West Khasi Hills. U la ong ruh ba kitei ki bar jylla ki dei ki bym don ïa ki kor ki sla kiba biang. Kumta ki la leit ban aiti noh ïa kitei ki bar jylla ha ki pulit Nongstoiñ bad hadien katto katne por la phah let phai noh ïa ki sha ki jaka ba ki wan.
U bah Mawlieh u la ong ruh ba ka jingïoh rung lait luid jong ki bar jylla sha West Khasi Hills lyngba ka ka surok Kampahduli sha Mawsikar, ka long kaba jur bha namar ba ka dei ka surok kaba ïaid lyngba ki jaka kiba dang don hapdeng jong ka jingbym pat ïapynbeit bad ym don ka jaka talasi jong ki pulit kumba long ha Athiabari.
Utei u nongïalam u la ong ruh ba ka seng ka kyntu ïa ka sorkar ba ka dei ban buh da ki khyrdop ha ki surok kiba pynïasoh bad ka jylla Asssam, ban talasi ïa ki bar bar jylla kiba wan rung hapoh ka district khlem don ïa ki kot ki sla kiba biang.
U la kyntu ruh ïa baroh ki nongsynshar shnong bad ki paitbah ba kin ïatreilang bad ka seng bad ban peitngor bha ïa ka jingwan rung ki bar jylla ha ki shnong ki thaw, ban nym ailad namar ka long ka jingma ïa ka lawei bad ka pateng ban wan.
