Bishkek, Kyrgyz Republic, Ïaïong 08 : Ka kynhun ïalehkai phutbol ki thei ka India ki la khur ïa ka jingjop ba arsien hadien ki saw sngi, da kaba pynliem ïa ka Kyrgyz Republic da 4-0 kol kaba dei ruh ka trai jaka ha ka jingïalehkai ha Dolen Omurzakov Stadium, bad ïoh rung sha ka Round 2 jong ka 2024 AFC Women’s Olympic Qualifying Tournament.
Da kaba ïoh ba pynliem ïa katei ka trai jaka da 5-0 ha ka jingïalehkai kaba nyngkong mynta ka taïew, ka India, watla ka la hap ban ïakhun hapdeng madan tang 10 ngut naduh ka kylla step, ka la lah ban ïalehkai bha bad ñion naphang sha ka kut jong ka Kyrgyz Republic, ha kaba ka Sandhiya Ranganathan ka ïoh ban thep ar kol, ka Anju Tamang bad ka Renu kaba mih madan kum ka thei shongben ki thep mar shi kol.
Ka Blue Tigers ka la ïalehkai bha naduh kaba sdang bad khlem da pynslem ka la ïoh ban lamkhmat hadien ba ka Sandhiya ka la thep ïa ka kol kaba nyngkong ha ka 18 minit jong ka kylla step, da kaba pynshat bol ïa arngut ki thei ïalehkai dien ka Kyrgyz Republic bad thep ïa katei ka shi kol.
Tang hadien katto katne minit, ka India ka la duh mynsiem hadien ba ka Karthika Angamuthu ka la shah beh noh na madan hadien ba ka la kum pynur bakla ïa ka kapten jong ka Kyrgyz ka Aizhan Boronbekova.
Hynrei kane kam shym la ktah ïa ka jingïalehkai jong ka kynhun, ha kaba ka Anju Tamang ka la khyrwit ïa ka shi kol ha kaba ka kynhun ka la ïoh ban lamakhmat da 2-0 kol, ïa katei ka shi kol ka Anju Tamang ka la thep ha ka minit ïalehkai ba 24.
U Thomas Dennerby, u la pynkhlaiñ ïa ka bynta ba shapdeng hadien ka jingshah beh noh ka Karthika Angamuthu bad pynmih madan ïa ka Sangita Basfore ha ka jaka jong ka Soumya Guguloth kaba dei ka thei ïalehkai wing, tang hadien katto katne minit ba la ïoh thep kol.
Ka Anju bad ka Sandhiya ki la bteng ban ñion shakhmat, bad ïoh ruih ki kabu thep kol, hynrei haduh ba kut jong ka kylla step, ka India ka dang lamkhmat da 2-0 kol.
Haba wanphai sha ka jingïalehkai jong ka kylla miet, ka Sandhiya ka la ïoh ban thep ïa ka kol kaba ar na bynta jong ka bad kaba lai na ka bynta ka kynhun. Ka Sandhiya ka la ïoh ban thep ïa katei ka kol lyngba ka jingïarap pashat bol ka Indumathi Kathiresan thei ïalehkai pdeng.
Ka Kyrgyz Republic, watlas ka la pyrshang ban pynphai ïa kitei ki lai kol, pynban kam shym la lah ban pynurlong bad u Dennerby u la pynmih madan sa ïa ka Ranjana Chanu kaba dei ka full-back ha ka jaka jong ka Manisa Panna.
U Dennerby u la bteng ban pynmih bujli player ha kaba ka Renu, Michel Castanha bad Dangmei Grace ki la mih ha ka jaka ka Indumathi, Sangita bad Sandhiya.
Ka Renu kaba la mih madan ha ka kylla miet ka la ïoh ban thep ïa ka kol kaba saw da kaba sangah da ka khlieh lyngba ka jingshut corner ka Dalima Chhibber. Bad haduh ba kut jong ka jingïalehkai ka India ka la ïoh ban pynliem suk da 4-0 kol bad ïoh rung mynta sha ka Round ba ar jong katei ka lympung knieh rung Olympic.
Ki thei ïalehkai ka India ba mih madan ha ka jingïakhun pyrshah ïa ka Kyrgyz Republic : Shreya Hooda (GK), Sweety Devi, Manisa Panna (Ranjana Chanu 63′), Ashalata Devi, Shilky Devi, Soumya Guguloth (Sangita Basfore 25′ (Michel Castanha 80′)), Anju Tamang, Indumathi Kathiresan (Renu 80′), Sandhiya Ranganathan (Dangmei Grace 80′), Dalima Chhibber, Karthika Angamuthu.
