Ka jingdon jong ka Meghalaya Land Transfer Act kaba khanglad ia kiwei pat ki heh paid jong ka ri India ban thied ne long trai ha ki jaka puta hapoh ka jylla ka la long shisha ka stieh ia ki jaidbynriew rit paid ka jylla. Lada ka jylla kam don ia kane ka jingiada ki trai shnong kin jin da la shah tyllep ha kiwei pat ki jaidbynriew heh paid tang ha i por iba khyndiat eh, hynrei wat la katta ruh naduh ka por jong ka sorkar Assam bun ki tnad treikam bad ki ophis heh ki la iohlad ban longtrai ia ka khyndew ka shyiap hapoh ka jylla. Kawei kaba la ju ktah bha na ka po r sha ka por kaba la wanrah jingeh ia ki paidbah ka dei ka jingiatyngkhuh bad ki bor shipai ne Defence Ministry jong ka ri India kiba la ioh bat ia ka bynta kaba bun eh jong ka khyndew hangne ha ka nongbah Shillong bad kiwei pat ki jaka hapoh ka jylla Meghalaya, ha kaba ha kiba bun ki khep kumba la ju iohi ha ki kot khubor, ki bor shipai ki ju klun klep ia ki jaka paidbah kiba markhap ne marjan bad ki.
Ha kiba bun ki khep ki paidbah ki la duh noh ei ia ki jaka sha ki bor sorkar ne ki bor shipai kiba la kam ba ki jaka ba marjan ki dei kiba la dep ban siew pisa naduh ki bor mynshuwa. Ka jingklun jaka jong ki bor sorkar kum ka tnad shipai bad kiwei pat kiba bat ia ki jaka kiba markhap eh bad ki jaka sor ka la buh jingeh shibun ia ki paidbah ha kine ki sngi namar ba ha ba ka la dei na ka bynta ban pyniar shuh bad kham pynkylluid ia ka iew ka hat, la kynti syngkieng kumjuh ruh ia ki surok hynrei ym lah ban len kumta namar ba bun na ki jaka ki la duh noh ei. Ym lah ban klet ba ha kine ki khyndiat snem ka la mih ka jinghuri hura hapdeng ki paidbah bad ki bor shipai ha ki thain nong ka shnong Lapalang ha kaba ki bor shipai ki lasdang ban pynibor bad klun ia ki jaka ba sah ki paidbah ne ki Civilian area.
Kaei kaba la jia ha kine ki khyndiat snem ka la buh jingeh shibun eh ia ki paidbah bad mynta kam don shuh ka jingshngain ban die ne aiti ia ki jaka paidbah sha ki bor shipai. Kiba bun hi ki sengbhalang, ki riew shimet bad ki paidbah mynta ki la pyrshah ia ka jingai jaka sha ki bor shipai, wat ha kine ki khyndiat snem ki la don ki tnad shipai kiba pyrshang ban iit jaka hapoh ka jyllla Meghalaya na ka bynta ban buh ia ka Ophis trei kam jong ki. ki paidbah kiba juh sah ha ki jaka ba markhap bad ki shipai barabor ki ju shongsyier ha ba ki iohi ia kum kitei ki kam klun jaka jong ki shipai. Ka ka don ka jingkynnoh ba bun na kiba shong ba sah ha kum kitei ki thain ki ju ioh ia ki shithi na ki bor shipai ba ki la shah khot hajir halor kaba iadei bad ka jaka ka puta jong ki.
Kumba kiba bun ki tnad treikam ka sorkar ne ki bor shipai ki la don hapoh ka jylla la bun phew snem mynta bad ka lah ruh ban long da ka spah snem, kumta ki kham sngew long trai shibun ia lade ban ia ki trai shnong, trai jaka ne wat ia ki bor pyniaid shnong ruh kumta tang shu ioh lad kim shlan ban klun ei ia ki jaka ba dei jong ki paidbah ruh. Ha kiba bun kum kine ki jingjia haba ki trai jaka ki leit ban dawa ne pynsngewthuh ba ka jaka ka puta ne ka khyndew ka shyiap kitei ki bor sorkar ki sdang ban pyni bor bad dawa ba ki riew paidbah ki dei ban pyni ia ki jingthoh. Kumjuh ruh ki tnad shipai ki ju dawa na ki paidbah ba kin pyni la ki don ne em ki kot ki sla kiba biang halor ka jinglong trai ia ka khyndew. Lada kan don ka jingbishar kaba hok khlem pep yn lap ba ki bor sorkar, bor shipai bad kiwei pat kin hap ban pyndem namar ba ia kiba bun ki jaka ba shu klun la shu kam trai tang da ka jingpyni ia ki map ba ki dro bad kin ym don satia ia ka dulir iadie ia thied kaba biang.
Kumta ki paidbah trai jaka ne ki bor pyniaid shnong kim dei satia ban ailad ia ki bor sorkar ne ki bor shipai ban shu klun ia ka jaka puta khlem kano kano ka dulir iadie iathied kaba biang. Ki bor pyniaid shnong ki don hok halor ka khyndew ka shyiap bad ki dei ma ki ban tohkit bad dawa na ki bor sorkar ba ki dei ban pynshisha da ki kot ki sla kiba biang halor ka jingkam bad jingklun jaka jong ki. Ki bor pyniaid shnong ki dei ki trai jaka ba dei hok (sons of the soil) bad kumta lada ki bor sorkar kim don ia ki dulir ban pynshihsha ba ki la thied ia kino kino ki jaka ka shnong ka donhok wat ban khnieh noh ia jaka kat kum ki kyndon ka riti ka dustur ka synshar u men barim ba naduh ki syiem bad ki raid. Namar wat naduh ki por hyndai kino kino ki jaka ba ki paidbah kim pyndonkam ka raid kan shimti noh ia ki.
Ka sorkar ka dei hok ban kyrshan ia ki khun ka ri kiba dei ki trai jaka trai puta bad hakhmat jong ki nongwei ki bymbiang ki jingpynsisha ki trai kim shnong kim don han pynshisha hynrei dei ban khanglad ia ki nongwei. Ka District Council kaba peit ia ka pynnneh pynsah ia ka riti dustur ka dei ban shim khia ban pynioh pat ia ki jaka ba la shah klun ha ki bor sorkar bad ki bor shipai.
