Kynnoh ka KSU ba pyrshang ka VHP ban wanrah ïa ka jingsngewpher niam ha Meghalaya

Shillong, Ïaïong 07: Ka Khasi Students Union (KSU) Laban Circle ha ka sngi Palei ka la leit ban aiti ïa ka dorkhas sha u Deputy Commissioner ka East Khasi Hills ba ki bor synshar district ba ki dei ban shim da ki lynti kiba tyngeh ban pynshtiom ïa ka Vishva Hindu Parishad (VHP), Shillong ha kaba ïadei bad ka raly kaba la pynlong ha ka sngi u Blei jong ka 2 tarik Ïaïong namar ka VHP ha kane ka raly ka pyrshang ban pynthut ïa ka shongsuk shong saiñ ha ka jylla da kaba wanrah ïa ka jingsngewpher niam hapdeng ki Khristan bad Hindu.
Haba kren sha ki lad pathai khubor u President ka KSU Laban Circle u Samla Reuben Najiar u la ong ba ha kane ka jingïaid raly ki dkhot ka VHP ki pyrshang ban pynshit ïa ki riewngeit Khrsitan da kaba ki hylla ki pyrta ïa ki slogan ïaroh blei jong ki tang mar ïa poi ha khmat ka Ïingmane Presbyterian Laban.
“Ki dkhot ka VHP kiba ïaid raly da ki arshaka marsien poi ha Iewdak Laban ki sahngeh hakhmat ka ïingmane Laban Presbyterian Church ha ka por 1 Nohphaisngi eiei bad ki pyrta ‘Jai Sree Ram’ bad kiwei ki kyntien kumba 10 minit watla ka jingïaseng hapoh ka ïing mane ka dang ïaid bad kane ka la pynlong ka jingkhñiuh ïa ki ba don ha ka jingïaseng,” u la ong.
U la ïathuh ba ha ka dorkhas, ka KSU ka la ujor sha u DC ba kine ki dkhot ka VHP ki la pynwit ruh ïa kiba thmu ban leit jingïaseng sha St. John’s Church, Laban Parish hynrei donbok hadien katto katne por ki rangbah na kane ka thaiñ ki la lah ban tem noh ïa kine ki khot ka VHP.
Shuh shuh u la ong ba ka seng ka dap da ka jinglyngngoh ban ïohi ba ki Pulit ka Laban Police Station kim shym la khang ïa kine ki dkhot ka VHP ban ieng ban pyrta slogan ban pynshit ïa ki riewngeit ba dang shim bynta ha ka jingïaseng hapoh ka ïingmane ka Balang Presbyterian wat la ki don lang ha kane ka jingïaid paidbah jong ki.
U Samla Reuben u la ong ba ka long kaei kaei kaba pynsuba sniew ruh ïa ka jingleh ka VHP ban pynlong ïa ka lehniam ‘Ram Navami’ ha ka sngi u Blei jong ka 2 tarik Ïaïong namar ha ka jingshshisha kadei ha ka 30 tarik Lber ha kaba baroh kawei ka ri India ka rakhe ïa kane ka sngi lehniam Ram Navami bad ong ba lehse kane ka jingrakhe ha ka sngi u Blei ka long ban pynshit ïa ki riewngeit Khristan.
“Hadien kane ka jingïaid paidbah ka seng ka ïoh jingtip ruh ba ka lah ban don biang kaba kum kane ka jingïaid paidbah ha ka sngi Thohdieng Bakhuid (Good Friday) bad ka sngi u Trai Paskha (Easter Suday) ki sngi kyntang jong ki riewngeit Khristan bad na ka liang ka seng ka kyntu ïa ki bor district bad ïa ki Pulit ban ym ai jingbit lada ki thmu ban ïaid paidbah kaban pynthut pat ïa ka jinglehniam sngi Thohdieng Bakhuid ki Khristan. Naka liang ka seng ka burom ïa baroh ki jaitniam hynrei kam kwah ban ïohi ba kiwei ki niam kin iuhroit pat ïa kiwei ki niam kaba lah ban wanrah ïa ka jingïasngewpher jaidbynriew” u la ong.
“Lada kine ki riewngeit na kiwei pat ki niam ki pyrshang ban pynthut ïa ka jinglehniam ki Khristan na ka liang ka seng kan sa shim sienjam wat ban pynlong kum kine ki jaid jingïaid paidbah ha ka por lehniam Puja jong ki,” u la bynrap
Shuh shuh u la ong ba la ïohsngew na ka jingïakren bad ka jingpyrta kine ki dkhot ka VHP ha kane ka jingïaid paidbah jong ki ba ki don ka jingthmu ban pynkylla ïa ka jylla Meghalaya kum ka jylla Hindu bad kin pyndonkam ruh kajuh ka buit kumba ki la leh ha ka Gujarat Riot kaba la jia ha u 2002.
Kane baroh kadei tang ka jingthmu ban pynthut ïa ki riewngeit Khristan jong ka jylla bad ka jingthmu ban kadei hi tang ban pyntieng ïa ki Riewngeit Khristan bad kiwei ki niam kiba don hapoh ka jylla bad kaba kam sniew ka long ba kine ki dkhot ka VHP ki pyrta ruh ba ki don ka thong ban pykylla ïa ka Meghalaya kum ka jylla ka niam Hindu” ula ong.