Shillong, Ïaïong 07: Ka Khun Hynñiewtrep National Awekening Movement (KHNAM) ka la ai da ka shithi ha u Deputy Commisioner ka East Khasi Hills ha ka sngi Palei ban pynpaw ïa ka jingpyrshah halor ka jingthmu jong ka Shree Hanuman Jayanti USTV Samiti ban pynlong ïa ka proseshon ha ka sngi Thohdieng Bakhuid (Good Friday) bad kumjuh ïa ka jingthmu jong ka RSS ban ïaid proseshon ha ka sngi u Trai Paskha (Easter Sunday) ha nongbah Shillong.
“Ngi pynpaw ka jingpyrshah ïa ka jingthmu jong kine ki kynhun ban pynlong ïa ka jingïaid proseshon namarba kane kan pynjngut ïa ka jingrakhe ïa ka sngi khuid ba kyntang jong ki Khristan bad ngi dawa ba phim dei ban ai jingbit ïa kane ka jingthmu ban ïaid proseshon’ ong ka KHNAM ha ka shithi ba la aiti ha u DC.
Ha ka shithi, ka KHNAM ka la kyntu ïa ki bor synshar jong ka East Khasi Hills District ban ym ailad ïa ka Shree Hanuman Jayanti Utsav Samiti ban pynlong ïa ka jingïaid proseshon ha ka 7 tarik mynta u bnai bad ïa kawei pat ka jingpynbna ban ïaid proseshon da ka RSS ha ka Easter Sunday ka ban long ha ka 9 tarik mynta u bnai bad ban bthah ïa ki ban pynlong ha kiwei pat ki tarik.
“Ngi ïohi ba kine ki dei ki jingpyrshang jong kine ki kynhun ban phiah ïa ka jinglaitluid ban mane Blei ha ri India bad ruh ïa ka jingpyrshang ban pynjngut ïa ka jingrakhe ïa ka sngi Thohdieng Bakhuid bad ïa ka sngi u Trai Paskha, kaba long ki sngi bakhuid jong ki Khristan ha ka jylla,” ong ka KHNAM.
U Bah Passah shuh shuh u la ïathuh ba wat hadien ba la ïoh ïa ka jingkular na u Deputy Commissioner, pynban ïa u kyrwoh ba la phah da ka Shree Hanuman Jayanti Utsav Samiti la pynsaphriang ha ka rynsan social media kaba ong, “na ki daw bym lah ban kiar bad ka jingbit ba la ïoh na ki bor synshar district, ka Hanuman Jaynti Shobha Yatra ka la pynkynriah ïa ka por ka ban sdang naduh 8:00 baje mynstep ha ka 07-04-202. Ngi sngewsih ïa ki jingbym biang.”
“Hadien ba la ïohi ïa u kyrwoh, sa shisien ngi la kren ïa u DC lyngba ka telephone bad ong ruh ba ngi ladep ban ïakynduh bad u hashwa kane ha kaba ïadei bad ka jingïaid proseshon bad u la pyntip ruh ïa ngi ba ïa ka jingai jingbit na ka bynta kane la pynsangeh. Halor u kyrwoh ba la saphriang ha ka social media ba ki la pynkylla ïa ka prokram sha ka 7 tarik ïaïong, u DC u la ong ba ma u ruh u la ïoh ïa kane ka kyrwoh bad u la ïakren ruh bad ki nongpynïaid ba ki dei ban pynsangeh noh mardor ïa ka jingpynlong proseshon lashai ka sngi,” u la ong.
“U DC u la ïathuh ba ki dang ïakren halor kane bad ngi sngew namarba ka jingbthah ka la wan na ki bor synshar district kam don jingmut shuh ba kan dang don ka jingïakren hynrei sa tang ban shu bud beit ïa ka jingbthah,” la ong u Bah Passah.
