Shillong, Rymphang 04: Watla ka Meghalaya ka la shah lamkhmat ha ka inning kaba nyngkong pyrshah ïa ka Sikkim hynrei wanphai da kaba tyngeh ha ka sngi ïakhun ba lai ban jop da 6 wicket ha ka lympung Ranji Trophy plate group kaba long ha Rangpo, Sikkim, hynne ka sngi.
U Aryan Borah u la tyngshaiñ bha ha kane ka jingïakhun da kaba khur haduh 8/36 kaba la ïarap ïa ka kynhun ban pynhap baroh ki wicket ka Sikkim da tang 80 ron ha ka inning tied kaba ar katba ka Meghalaya ka la pyndep suk ban beh ïa ka thong ha kaba u Kishan Lyngdoh u la khyrwit haduh 69 ron.
Dei ka kynhun kaba ïalehkai hala ïing kaba bat ïa ka jingkyrmen ha kaba sdang. Kumban shu pynkynmaw, ka Sikkim ka la tied 284 ron (all out) ha ka inning ba nyngkong bad pynhap ïa ka Meghalaya da tang 191 ron.
Haba shimti ïa ka pali tied hynnin ka sngi saitjaiñ, ka Sikkim ka la shah pynhap 4 ngut da 55 ron, bad ki la duh ïa baroh hynriew ngut hynne ka step da tang 25 ron.
Dei hangne ba u Aryan, u la lah ban sei madan ïa ka sap ka jong u da kaba khur wei hadien u wei ki rangtied na ka liang pyrshah, saw ngut napdeng kitei ki wicket ki dei kiba la shah pynhap na ka bol kaba dei stump. Ryngkat ki saw wicket kiba u la khur ha ka inning kaba nyngkong u ne u rangïalehkai ba 23-snem u ba la shahjied ban ïakhun ha ka Ranji na bynta kane ka jingïalehkai, u la pyndep da kaba khur 12/129 bad khur syndon ïa ka nam Player of the Match.
Hynrei watla kata ruh, hadien ba lamkhmat da 93-ron ha ka inning kaba nyngkong, ka Sikkim ka la buh ïa ka thong da 174 ron ïa ka Meghalaya ban tied khnang ban jop.
U Lee Yong Lepcha, u ba la pynhap san ngut ki rangtied ka Meghalaya ha ka inning kaba nyngkong, u la ïoh ban khur ar ngut katba u Ankur u la ïoh pynhap ïa u Raj Biswa da tang 22 ron.
Hadien kane, ka kynhun ka la sah da 54/3 ha ka por ba u Kishan bad u Jaskirat Singh Sacheva kin mih ryngkat ban beh ïa ka thong. Ryngkatlang ki la kamai 108 shuwa ban hap u wicket ba saw, kaba la pynsuk ïa ka jylla ban khur ïa ka jingjop.
Da lai sien ki namjop bad ar sien rem ha ka robin stage, ka Meghalaya ka la thikna ban rung sha ka semifinal ha kathup ïakhun plate group. Baroh ar ki semi kin sdang ha ka 9 tarik Rymphang bad ka jaka bad ka kynhun ba ka Meghalaya kan ïakhun yn sa pyntip hadien.
