Shillong, Rymphang, 03: Ka Bharatiya Janata Party (BJP) ha ka sngi Saitjaiñ ka la pynpaw ba kam don kano kano ka jingpyrshah lada u Lat ka Jylla u ai jingkren hapoh ka Ingdorbar Thawaiñ ka Jylla da ka ktien Hindi.
Ka Voice of the People Party (VPP) ka la phah da ka jingthoh sha u Lamphang ka Ingdorbar Thawaiñ ka Jylla Thomas Sangma ban pyrshah lada u Lat ka Jylla u kren da ka ktien Hindi ha ka sngi sdang ka Dorbar Mang Tyngka ka ban sdang ha ka 16 tarik mynta u bnai.
Ka VPP ka la dawa ruh ïa u Lamphang ba u dei ban buh da u nongpynkylla ktien lada u Lat u kren da ka ktien Hindi ha ka Dorbar Mang Tyngka.
“Ngam kwah ban kynthoh eiei kaei kaba kiwei pat ki seng saiñpyrthei ki don jingmut ban leh,” la ong u Chief Spokesperson ka BJP Meghalaya Pradesh ha ka jingïakren bad ki lad pathai khubor.
“Ka ktien Hindi ka dei ka National Language, lada phim pdiang ïa ka ktien Hindi kumno phi pdiang pat ïa ka ktien Phareng,” la buh jingkylli une u nongïalam ka BJP ïa ka VPP
“Kine ki ar tylli ki ktien ki dei kiba la ithuh bad nalor kata wat ïa ka ktien lajong ruh phi lah ban kren,” u la ong.
“Na ka iïang jong ngi, ka BJP kam don jingujor eiei lada (u Lat) u kren da ka ktien Hindi.
U la ong ruh ba ka Secretariat jong ka Meghalaya Legislative Assembly ka la pynbiang ruh ïa ki kopi ba la pynkylla ktien na ka bynta ki nongthaw Aiñ ki bym sngewthuh ïa ka ktien Hindi.
“Phim lah ban shu pynlong mat politik,” ula ong bad bynrap, “ngi donkam ban pynleit jingmut ha ki kam pynroi kiba kongsan ym ban pynleit jingmut ha kum ha kine ki kam.”
