Shillong, Rymphang 04: Ka Shillong Lajong FC ka la duh ban khur wat tang shi point naka jingïakhun kaba la long hala ïing hynnin ka Sngi Saitjaiñ hadien ba ka la shah pynliem da 1-0 kol ha ka Inter Kashi ha ka sngi ba la bteng biang ïa ka lympung I-League 2023-24 hadien ka shuti ha madan phutbol First Ground, Polo.
Kane ka dei ka namrem kaba saw ïa ka Lajong mynta u snem lada kynthuplang ïa ki jingïalehkai ha ka lympung Super Cup. Kane ka dei ruh ka jingïalehkai kaba nyngkong jong ka lympung I-League mynta u snem, hadien ba la sangeh shipor ïa kane ka lympung naduh u Nohprah ban sdang ïa ka Super Cup.
Ka dei ruh ka sien kaba nyngkong ban pynïalehkai ha ka por jan miet ha katei ka madan bad ruh ka sien kaba nyngkong ïa kine ki arkynhun ban ïakynduh.
Haba bishar ïa ka jingïakhun, lah ban kdew ba ka kynhun ba ïalehkai hala ïing ka la ïoh shibun ki kabu pynkhihjar bad ruh ki corner hynrei kam shym la lah ban pynurlong wat tang kawei napdeng kitei ki kabu ba la ïoh.
La ïoh ban sakhi ïa ka jingtbit u Julen Perez Del Pino u ba la pashat ïa ka bol nalor u bak ka Lajong ban buh na bynta u Gianni Miguel Dos Santos, shuwa ba u tei u snar thep kol na Netherlands u la lah ban ïaid lait na u Ronney Kharbudon ban khyrwit ïa ka bol shapoh kol ha ka 23 minit ïa kaba u Neithovilie Chalieu um shym la lah ban ïada.
Na ka liang jong ka Lajong ka la pyrshang bun ki lad ban ïoh pynphai, hynrei ka jingtbit jong u rangapkol ka liang pyrshah-u Arindam Bhattacharya ka la khanglad ïa ka Lajong ban ïoh pynkhihjar, bad ki la don ruh katto katne ki kabu ba paka na u Figo Syndai hynrei ki la shah kyntait noh ha u Bhattacharya.
Haduh kaba kut jong ka jingïakhun, ka Lajong kam shym la ïoh ban pynphai kaba la pynlong ïa ka kynhun ban duh khur wat tang shi point na kane ka jingïalehkai. Ka SLFC ka la dei ban ïoh jam sha ka kyrdan ba ar lymda kam shah rem bad jop ha kane ka jingïakhun, hynrei kumba ka long, ka kynhun ka dang ïaisah ha ka kyrdan ba san da 19 point na ki 12 sien ïakhun.
Katba na ka liang jong ka Inter Kashi, da kane ka namjop ka la ïoh ban kyntiew ïalade sha ka kyrdan ba 6 da 18 point ba ka la khur na ki 12 sien ïakhun. Baroh ar kynhun ki la pyndep kham bun ki jingïalehkai ban ïa kiwei ki kynhun mynta ka samoi.
