Shillong, Naiwieng 27: Ka Seng Kur Warjri kan rakhe ia ka Lyngkhuh Arphewsan snem jong ka Dorbar Kur Warjri ka ba la sdang naduh u snem 1998. Ka Dorbar Kur Warjri kan long ha ka 12tarik Nohprah, 2023 ha shnong Thynroit ha ka ba la khmih lynti ba ki parakur parajait Warjri na kylleng ka Ri Khasi ba kin ia poi ryntih naduh dang step.
La plie ia ka rakhe lyngkhuh arphewsan snem jong ka Dorbar Kur Warjri ka ba la long ha Sohryngkham ha ka 11tarik Naiwieng 2022 bad yn pynwai ia ka jingrakhe ha ka Dorbar ha Thynroit. Ha kata ka sngi yn sdang shwa da ka marehthong Marathon naduh 8baje mynstep na Thangsning sha Thynroit, ka ban bud artat da ka Dorbar, tang shu kut ka marehthong.
Ha kane ka shisnem ba la lah, la pynlong ia ki ba bun ki rong ki taw ban lehkmen bad kyntiew ia ki sap tynrai jong ki khynnah bad samla jong ka Kur Warjri.
Ha ka ba sdang la pynlong ia ka jingpyninam ia ki syntiew bad la pynlong ruh ia ka lehkai kilan met kum ka Football bad Basketball, nangta ka thoh Essay, poitri, ka rwai ka siaw, ka shad ka kimen, ka pyninam ia ki riam ki beit bad ka thohdur thohdar. Ki nongjop ha kita ki jinglehkai kilan met bad kilan jabieng kin sa ioh la ki khusnam ha kata ka sngi ban long ka Dorbar ha Thynroit.
Nalor ki jingrakhe baroh shisnem, ka la jia ryngkhat ba ka 12tarik Nohprah, 2023 ka dei ka sngi snem thymmai Khasi katkum u bnai bneng.
Kumta na ka liang ka Seng Kur Warjri ka la mynjur ban ia syllok bad ka synjuk ki barikor, ka Riti Academy ha ka ban rakhe artat ia kata ka snem thymmai Khasi ka ban sdang naduh ka sngi babud, 13tarik Nohprah 2023. ha kane ka sngi kut yn sa don ruh ka byrngia lehkmen lyngba ka rwai ka siaw ka put ka tem da ki kaitor bad duhalia na ka Kur Warjri.
Kum ka jingpyrshang ban tehsong ia ki parakur parajait ki ba dei na kajuh ka thymmei, ka Seng Kur Warjri ka la rai ban wer sngewbha ia ki parakur parajait ki ba la kylla lyngba ki ryta da ka ba la sot na ki kyrteng shnong trai kum ki Kur War Nongbri, War Tynghah, War Manai, War Wahksing bad Nongbri. Ka jingthmu jong kata ka long ban pynkynmaw ia la ki parakur parajait ban tipkur tipkha khnang ban lait na ka shongsang bad ban ym iakam kur bakla bad ki ba ym dei kur dei jait na kajuh ka thymmei.
Na ka daw ba la don teng ka jingbakla ha ka imlang sahlang namar ba khlem da phikir ha ka jingkam kur kam jait ha la ki paradoh parasnam bad kumjuh ruh ia ki ba ym dei na la ka jaitbynriew, kynthup ruh ia ka shongsang ka ba la jia na ka por sha ka por, kumta la rai shijingmut ban tehsong ha la ki parakur parajait ki ba dei nba ka juh ka thymmei.
