Jowai, Ïaïong 09: Ki paid riewngeit Khristan ha kylleng shi tyllup ka pyrthei hadien ka jingshah ïap jong u Jisu Khris ha ka sngi Thohdieng (Good Friday) mynta ka sngi ba lai kaba dei ka sngi (Easter Sunday) ba u Trai Jisu ula mihpat na kiba ïap bad la pynlong ïa ka jingrakhe ba kyrpang ïa kane ka sngi ka jingjop U Jisu ïa ka jingtep.
Ha Nongbah Jowai ki Balang Khristan bapher bapher kila rakhe ïa kane ka sngi naduh ka por step kaba dei ka kynta (Sunrise Service) hala ki jong ki jong ki Balang, nangta bud sa ki jingïaseng paitbah ha ka por 10 baje mynstep bad kumjuh ha ka por 1 baje nohphai sngi bad kiwei de.
La sakhi ha ka Balang Khimusniang, Jowai ruh ha ka jingïaseng paitbah ha ka por shi baje janmiet ïa ka khubor na ka ktien U Blei la sam da u Rev. C.L. Susngi ula la pynshong nongrim na u Job 14:14.
Na ka liang u Pastor ula ïathuh shaphang ka jinglong u Job uba long u briew ba sheptieng ïa U Blei, ula kyntu ïa ki paidriewngeit ba hadien ka jingim wan ka jingïap bad hadien ka jingïap un wan ka jingbishar.
Shuh shuh u Pastor u ong lada u Khrist um shem la mihpat ka long kaba lehnohei ïa ki Apostol kiba dei ki nongbud u Jisu Khrist ki ban leit ïalap bad kiba aiti ïa ka jingim bad shah pynïap ha ka kyrteng u Khrist. Ula pynkynmaw ruh shapang ki shakri jong u Blei kiba la im da ki spah spah snem mynshwa.
Ula ong ruh kum ki riewngiet ha ka sngi ba khadduh kan don ar bynta kita ki long ka bneng bad ka dujok bad kum ki khun u Blei ki dei ban ïaid ha ka lynti ka mon kaba ïadei bad u Trai Jisu khnang ban ïoh ïa ka jingpynim. U ong lyngba kane ka Easter Sunday kum ki paid riewngiet kin long kiba la pynkhreh ïaka jingim na ka bynta ka jingwan arsien jong u Trai Jisu bad ban long kiba la pynkhreh na ka bynta ka jingim.
