Nongpoh, Ïaiong 09: Kumba ki paid riewngeit ka Balang Katholik ha satlak ka pyrthei mynta ka sngi ki la rakhe ïa ka Paskha ban lehkmen halor ka jingmihpat u Jisu, ba ki ngeit ba u la wan sha ka pyrthei ban shah sah narphna ban pynim ïa ka pyrthei bad ki paid riewngeit ka Balang Katholik jong ka Nongpoh Parish ruh ki la shim bynta da ka jingriewblei bad shithrem ban lehkmen ïa kane ka sngi ka ki ngeit halor ka jingmihpat u Jisu ba la tip kum kata ka Paskha.
Ha kane ka jingleh kmen paskha la shim bynta ruh da u Fr. Debasis kum uwei na u phadar rangbah ka Balang Katholik ha ka rta kaba 91 snem kaba u la long uta u nongpynbynta ïa ka niam ka rukom lyngba ka mass bakhuid ha ka jingdon lang u Parish Priest ka Nongpoh, u Fr. Peter Syiemlieh, ki nongïalam niam bad ki paid khristan na kylleng ki shnong jong ka Nongpoh parish.
Nalor ba ki paid riewngeit ki la ioh ban shim bynta ban lehkmen ïa kane ka Paskha lyngba ka mass bakhuid, ha kane ka sngi la pynsngew ruh lyngba ka ktien ka jong u Blei kaba kren shaphang ka jingïap jong u Jisu bad haduh ba u la mihpat kaba long ka jingpynim ïa ka pyrthei hi baroh kawei.
Na ka liang u Fr. Dibasis kum u nongpynbynta ïa kane ka niam ka rukom ha kane ka mass paskha, u la kren ruh shaphang ka jingwan longbriew u Jisu na ka bynta ban pynlait im ïa ka pyrthei hi baroh kawei.
U la ong ruh haba pharia ïa ka ktien ka jong u Blei lyngba ka Gospel u Ioanis kaba kren shaphang ka jingshah ïap u Jisu bad uba la mihpa tha ka sngi kaba lai, ka dei ka mon kaba la phah da u Blei ba un wan ban shah shitom haduh ba la shah sah narphna bad ban mihpat ha ka sngi Balai ka long ban pynim ei ïa ka pyrthei kum uta u khun jong u Blei.
U la ong ruh ha ka jingïaid lynti ngi kynduh shibun ki jingeh ki jingjynjar bad teng teng ki jingtynjuh ba harukom ha ka jingim bad ngi dei ban sngewthuh ba kane ka dei ka bynta jong ka jingim, ha kaba U Blei la phah ïa la u khun sha kane ka pyrthie ban ïap halor ka Diengphna bad ban mihpat na ka bynta ban pynim ïangi iwei pa iwei kiba la jot bad ngop ha ka pop.
Namarkata, u la kyntu ruh ïa ki paid riengeit ba ki dei ban sngewthuh ba ka jingmihpat jong u Jisu ka dei ka jingkyrmen bad ka jingpynim ïa ngi iwei pa iwei ha kaba u la kiew noh shabeng ban shong ha ka mon jong u kpa jong u bad un sa wan shaw pat ïangi bad kordit pat lada ngim lah ban leh ïa ka mon ka jong u Blei ngin hap ban mad ïa ka jingshah pynshitom hakhmat jong u Blei wat lada u Jisu u la wan ban pynim ei ïangi da kaba ïap halor ka Diengphna, u la bynrap.
Ha kane ka lehniam paskha ki paid riewngeit nalor ba ki la shah skhor ïa ka ktien ka jong u Blei ryngkat ki kyntien kyntu kynpham da u Fr. Dibasis bad ha kane ka sngi ki la shim bynta ruh ban bam ban sip ïa ka met bad ka snem jong u Jisu kaba long ka jingbam ba kynja mynsiem ba u la wan khnang sha ka pyrthei kum u khun jong u briew ban pynlait im ïangi na ka pop.
Ha ka janmiet pat la pynkut ïa kane ka leh niam paskha da ka jingleh burom ïa ka Sacrament bakhuid tam u Jisu ba la shim bynta biang da ki riewngeit ka Balang Katholik jong ka Nongpoh Parish.
