Shillong, Jymmang 16: Ki riewngeit Budhhist hynne ka sngi nyngkong kila rakhe ïa ka Budha Purnima ha Buddha Temple kaba don ha Polo, Shillong
Namar ka khlam Covid-19, ïa kane ka jingrakhe la ïoh ban rakhe biang hadien arsnem, ha kaba bun bah ki riew ngeit kila wan sha Temple ban dem ha ki jingduwai.
Ha ka por mynsteo, ki Monk jong kane ka Temple kila pynlong ïa ka jingduwai kyrpang halor ka “Jingsuk”.Ha Lumparing Tibetan Buddha Temple ruh, bun bah ki riew ngeit kila leit ban iashimbynta ha ki jingduwai.
Haba ïakren bad ki nongthoh khubor, u Secretary ka Shillong Buddha Temple Arup Barua ula ong ba watla ka Buddha Purnima ka dei ka jingrakhe ba manla u snem, hynrei mynta u snem ka jinglong kongsan jong ka Buddha Purnima ka ïapher namar namar baroh kawei ka pyrthei kala nang lait na ka khlam Covid-19.
“Ha ka por ba wan lynshop ka khlam, ka pyrthei kala sngewthuh ïa ka jingkongsan jong ki kyntien u Blei Buddha uba la ai ïa ka khubor halor ka jingïaieid para briew bad ban kiar na ki jingiaumsnam” ula ong.
“Hynrei mynta, ka pyrthei kala mad biang ïa ka jingshah ktah jur na ka thma hapdeng ka Russia bad ka Ukraine. Namar kane, ka jinglong kongsan ki kyntien u Buddha kala nang shong jingmut shuh shuh ha kane ka jingrakhe ïa ka Buddha Purnima bad ki paidbah kila iaduwai ïa u Blei ban wanphai ka jingsuk.
