Sohra, Jymmang 16: Ka Kshaid Nohsngithiang, kaba don ha Elaka Mawsmai, mynta ka sngi, ka la khring da ki spah ngut ki nongshangkai pyrthei, namar ba la kup ïa ka dur kaba ithiang shisha naka daw ka jur jong u slap ha kine ki sngi baladep, kaba la pynlong ïa kane ka Kshaid ban noh da ki um kiba rymphum.
Ym tang ha Nongsngithiang la ïohi ba da ki spah ngut ki nongshang pyrthei ki la tuid ha kiba bun ki Tourist Spot ne ki jaka jngohkai jong ka Ri Sohra. Mynta ka sngi ka mariang ka la rang u slap bad u lyoh uba ju kah dum ruh u kynriah kaba pynlong ïa kiba bun tylli Kshaid bad ki jaka jngohkai ban shai itynnad bha. Ki nongshang pyrthei ki la pynpaw ka jingsngewkmen ba ïoh mad ïa u slap uba jur jong ka Sohra ha kine ki sngi baladep bad mynta ka sngi pat ban ïohi ïa ki Kshaid, ki Wah bad ki riat ki ram jong kane ka jaka ba pawnam ha ka pyrthei.
Uwei u nong Jharkhand uba la wan ba ka ïing ka sem jong u, u la ïathuh ba u la sah ha Sohra mynta la lai sngi, hynrei um pat sngewhun ban leit phai noh namar ka jingitynnad palat ka mariang ha Sohra. “Nga wan ryngkat bad ki kmie bad ki khun. Ka long ka por kaba kmen tam na ka bynta jong ngi lang baroh ban poi ha kane ka Shnong bad khamtam ban ïohi ïa ka jingitynnad jong ka”, u la ong.
Ki don ruh kiwei pat kiba la wan na ki jylla jong ka bynta ba shathie jong ka ri India bad pynpaw ka jingkmen ban ïohi bad ïakynduh ïa ka jingjur jong u slap bad khamtam eh ïa ka jingitynnad jong ki Kshaid.
Ki nongpynïaid ïa ki jaka jngohkai ha Sohra, ki la pynpaw ka jingsngewkmen ba ka kam shang pyrthei ka la sdang ban khie biang hadien ba ka la shah ktah jur ha kine ki arsnem baladep, namar ka jingpang COVID. “Hooid mynta kane ka kam ka la sdang ban khie biang bad kane ka wanrah ïa ka jingkyrmen ïa ngi, kiba la shim da ka ram na ki Bank ban shna ïa ki Resort, ki Home Stay”, la ong iwei na ki nongpynïaid kam jngohkai pyrthei ha Mawsmai.
