Shillong, Jymmang 16: Ka seng Thma u Rangli hynne ka sngi nyngkong, kala pan na ka Meghalaya Lokayukta ïa ka bor ban shong bishar ïa ka “Jingdon Jingem bad ka Spah Nongkynti” jong baroh ki Nongtrei Sorkar kat kum ka jingpynbna don spah (Assets Declaration) kaba dei ban leh kat kum ka Meghalaya Lokayukta Act, 2014.
Ka Nongïalam jong ka TUR kong Angela Rngad kala leit buh da ka jingthoh hakhmat u Chairperson ka Meghalaya Lokayukta ban pan ïa ka bor ban ïoh shong bishar ïa ki kot ki sla spah nongkynti jong ki Nongtrei Sorkar.
Lah ban kdew hangne, ka Meghalaya Lokayukta ha u bnai Naiwieng 2019, kala bthah ïa baroh ki Nongtrei Sorkar ba ki dei ban pynbna ïa ka jingdon jingdem ne spah nongkynti bad kumjuh ruh ki ram ki shah ba ki don kat kum ka Meghalaya Lokayukta Act, 2014.
U Chairperson barim ka Lokayukta PM Musahary ula pynmih ïa kane ka hukum halor ka jingujor kam bamsap bala mudui da uwei u Rangbah pyrshah ïa ki Nongtrei Sorkar, uba la pan jingtip ïa ka jingdon jingem jong ki. U Chairperson ula bthah ïa u Chief Secretary ban bthah ïa ki bor ba halor jongki Tnad bapher bapher ba kin phah ai jing kheiñ ïala ki jong ki Nongtrei halor ka spah ka phew bad ka ram ka shah ba ki don.
Ha ka shithi, ka TUR kala kdew ba kat kum ka Chapter XIII jong ka Meghalaya Lokayukta, la kren shai ba baroh ki Nongtrei Sorkar ki dei ban pynbna ïa ka jingdon nongkynti bad ka ram ka shah. Ka kren ruh ba kane ka jingpynbna ka long ruh wat ïa ki Kurim bad ki Khun ki Kti.
Ka kong Angela kala ong ba kat kum ka aiñ, baroh ki Nongtrei Sorkar ki dei ban ai ïa kine ki jingtip tang hapoh ka laiphew sngi hadien ba pyntreikam ïa ka Act. Ki dei ruh ban ai jingkheiñ ïa ka jingkamai jong ki ba shisnem shi snem ha lane shuwa ka 31 tarik Naitung manla u snem.
Ka Nongïalam jong ka TUR kala kyntu ïa u Chairperson ka Lokayukta ban sa ai ktien khnang ban ïoh leit peit bad lum ïa ki kot ki sla na ka Ophis jong u.
