Shillong, Jymmang 16 : Kum ka jingkynmaw ïa ka Proseshon Maria kaba nyngkong duh jong ka Ri Khasi Jaiñtia kaba la long ha ka 24 tarik u bnai Jymmang 1922, ka St. Dominic Savio Church Mawlai Parish, Shillong kan pynlong ïa ka Proseshon Maria kaba 100 snem ha ka 22 tarik mynta u bnai.
Ha kane ka sngi yn sdang da ka Mass Bakhuid ha ka por 10 baje mynstep bad ban bud sa ka Prosseshon Maria ha ka por 1:30 janmiet. Ha kane ka sngi yn sa rah ruh da ka Statue Maria kaba la rah ha ka Proseshon Maria kaba nyngkong eh.
Katkum ka kyrwoh na u Bah Stelin Dkhar
General Secretary, ha kane ka sngi yn sa rakhe ruh ïa ka Jingdap 100 snem ka jingwan ki Salesian Missionary sha kine ki thaiñ shatei lam mihngi jong ka Ri India bad ha Ri Khasi Jaiñtia.
Na ka liang ka Parish ka khot sngewbha ïa ki paid riewngeit jong ka Shillong Archdiocese, Nongstoiñ bad Jowai Diocese ban wan ïa shim bynta lang.
La pyntip ruh ba la pynbeit na ka bynta ki jaka pynïeng kali, kata ha Sacred Heart Girl’s Higher Secondary School bad Sacred Heart Theological College na ka bynta ki Riewniam baroh. Ha Savio Juniorate, Sacred Heart Boy’s Higher Secondary School na ka bynta ki kali rit jong ki paid riewngeit bad na ka bynta ki bos pat la pynbeit ban pynieng ha Kjatshnong Phudmuri.
Shuh shuh la pyntip ba yn ym shah ban rung kali naduh ka por 9 baje mynstep haduh 5 baje janmiet naduh Phudmuri Kjatshnong ter ter haduh khmat Ïingmane barim jong ka Balang Presbyterian, Phudmuri.
La pyntip ruh ba naduh ka por 1 baje nohphaisngi haduh ynda kut ka Proseshon ym shah ban rung kali sha Stand Bus Phudmuri na FCI, na Kyntonmassar, na Lad Motsyiar bad na Jingkieng Wahumkhrah hynrei kin hap ïaid da kiwei pat ki lynti kiban ym pynthut ïa katei ka Proseshon.
