Tura, Jymmang 16 : U Vice President (VP) jongka BJP uba dei ruh u MDC jongka Tura u Bernard N Marak u la byrngem ban ujor da ka mukotduma pyrshah ïa ki trok, ki nongkhaïi maw, ki tnad sorkar bapher bapher kynthup ïa ka Garo Hills Autonomous District Council halor ka jingbamsap bad ka jingpynkheiñ ïa ka hukum jongka ïing bishar Supreme Court da kaba shah iaki trok ban kit palat 30 ton u maw ban khaïi beaiñ sha Bangladesh kaba la pynsniew ïa ka surok Dalu bad buh ïa ki paidbah haka jingeh kaba khraw.
U la kynnoh ba kine ki trok ki ïaid khlem ki kot ki sla kiba biang bad khlem ki number plate namar la sakhi ïa kane ha ka jingleit jurip bniah jongu da lade ha ka jaka ba la pynïeng laiñ ïaki trok lynter ka surok Dalu. U la kynnoh ba baroh baroh la ïa sngap jar beit halor kane ka jingkhaïi beaiñ ïa u maw namar la dep thong tyngka lut ïa ki. U la kynnoh ba kawei kawei ka trok ka kit beit palat ïa ka 30 matric ton u maw katba ha ki khyrdop ba thew ïa ki trok ( weight bridges) pat la pynpaw beit tang 21 matric ton. Ka daw ka long ba ïa utei u maw ba la kit palat na ka 21 ton pat la siew da ka pisa sha ki khyrdop jongki tnad sorkar naduh ka Forest, Custom, District Council, ki Seng Bhalang bad ter ter bad na kata ka daw ym don shuh ban ïeng pyrshah ïa kane ka jingleh beaiñ.
Une u nongïalam jongka BJP u la leit pynlong da ka jingïalang ha ka Sngi Saitjaiñ ha Dalu bad ha ka jingtohkit na ki trok ki la phla ba ki la dep siew da ka pisa sha kitei ki tnad sorkar ba la kdew haneng bad na kata ka daw la shah beit ba kin kit palat pud ruh wat la ka long pyrshah ïaka hukum jongka ïing bishar Supreme Court ruh. Na ka liang u Bernard u la pynpaw ba ka BJP kan tan ïa kine kiba pynkheiñ ïa ka hukum jongka ïing bishar ba halor duh jongka ri sha ka ïing bishar.
Ka pisa ba ki trok ki hap ban siew man ka shitrok ka long sha ki Nokma 200/- Monopoly 300/- State Forest 300/- GHDC 200/- MLP 500/- State Forest 200/- GHDC 200/- NGO 200/- State Forest 500/- MLP 300 NGO 400/- GHDC 200/- MLP 1200/- GDC 200/- NGO 200/- NGO 200/- Monopoly 200/- Monopoly 200/- MLP 200/- State Forest 200/- GDC 200/- NGO 200/- GDC 200/- MLP 200/-
Ha Dalu Weighbridge – 1,700/- Custom – 1,000/- Forest – 150/- Sanitization – 50/- Association – 500/- MVI – 500/- Tang ha Dalu baroh long – 3900/-
Lada kheiñ lang baroh long – 10,800/- shitrok tang kaba hap siew nangta sha u DFO – 50,000/- na ka bynta kawei ka thup kot kaba kynthup100 tylli ki challan bad haba kheiñ ka long 500 shi trok bad kumta haba kheiñ lang baroh ka jingsiew shitrok shitrok ka la kot sha ka 11,300 tyngka.
