Kynshi, Jymmang 16: Ka jingwan ka jingshlei um kaba kynsan kynsan bad ka jingther u lapah ba tang khyndiat kynta, ka la wanrah pynban ka jingjulor kaba baroh shi aïom.
Kane ka la jia ha ka Shnong Kynshi bad kiwei kiwei de ki Shnong kiba don ha Mawthadraishan Block. Lah ban kdew hangne ka 13 tarik mynta u bnai, u slap uba jur bha u la ther ha ka por mynstep bad kane ka jingjur jong u slap ka la long kumba theh na ktang bad tang hapdeng khyndiat mynta, ka wah Kynshi kala shlei kynsan bad tuid ruh sha ki jaka rep jong ki paidbah ha ka Shnong Kynshi.
Hynrei wat lada kane ka jingshlei ka wah ka kham duna na ka jingshlei ha ka snem 2020, pynban ka jingsted jong ka jingshlei ka la pynlong ïa ka um ba kan tuid sted bad khlaiñ bha. Kane ka jingkhlaiñ jong ka um ka la syllad naphang ïa ki jaka rep, kat haduh ba ka la khlong lut ïa ki phan na kine ki jaka rep.
Katkum ka jingïathuh ki nongrep, la ong ba une u bnai um pat dei satia u bnai uba la long ban khlaw ïa u phan shabar, namar ba u dang lung bad kane ka jingrat jong ka um bad sei ïa u phan shabar ka la pynlong ba une u phan um long shuh uba myntoi ne uba lah ban pyndonkam. “Baroh u phan uba la mih shabar bad ka jingshlei um ka la pynsniew syndon ïa u phan”, la ong ki nongrep.
Ki la ïathuh ba ha ka jingshisha u phan mynta ka snem u long bha haba peit na uba la sha sei shabar. Hynrei kane ka jingslei um, ka la pynsniew lut ïa u bad kan pynlong ïa ka Shnong Kynshi baroh kawei ban nym ïph phan satia mynta ka snem.
“Ha u snem 2020 ruh ka la don ka jingshlei um bad ktah ïa ki jaka rep, hynrei kam da jureh pat kumba long mynta ka snem, haduh ba ngi la duh lut ïa baroh u phan ba ngi thung”, la ong ki Nongrep.
Na ka liang jong ki, ki la pynpaw ba dei sa tang ka jingkner kti lang na ka tnad ka rep ka riang kaba lah ban ïarap eiei ïa ki na kane ka jingduh kaba khraw na kane ka jingshlei um. Nalor u phan uwei pat u jingthung ba la shah pynjulor ha kane ka jingshlei um ki long u riew hadem, ki jhur bad kiwei kiwei.
