Nongstoiñ, Nailur 5: Ban kynmaw burom ïa ka sngi kha jong u Dr.Sarvepalli Radhakrishnan, u Vice President ba nyngkong duh ka Ri bad u President barim jong ka Ri Indïa, ka District School Education Officer West Khasi Hills District Nongstoiñ, ha ka 5 tarik Nailur 2023, ka la rakhe ïa ka ‘Sngi Lehkmen Nonghikai kaba 62’ ha Bishop Hall, New Nongstoiñ.
Kane ka jingrakhe ka long kum shi bynta ban pyrto ïa ka jingshakri bad ka jinglenlade jong ki nonghikai, na ka bynta ban tei bad pynwandur ïa ka lawei jong ki khynnah kumjuh ruh na ka bynta ka bha ka miat ha ka imlang ka sahlang.
La sdang ïa kane ka prokram ha kane ka sngi, da ka jingkren pdiang na I kong D. Hujon SDSEO, Nongstoiñ ha ka jingdon ryngkat lang jong u Bah R. G. Momin, MLA Chairman Meghalaya Mineral Development Corporation, Rambrai Jyrngam Constituency kum u Kongsan, I Kong. L.Syiemlieh, Rtd. DSEO Nongstoiñ kum ka nongshah khot kyrpang, ki Principal, nonghikai ki khynnah skul bad kiwei kiwei kiba la wan pynshit pynshngaiñ ha kane ka sngi kyrpang jong ki nonghikai.
Haba ai jingkren ha kane ka sngi u Kongsan Bah R.G Momin, u la ai ka jingïaroh ïa ka jinglah bad jingtrei shitom jong ki nonghikai, ba ki long kum ki rishot jong ka imlang ka sahlang, ki nonghikai kidei ki nongprat lynti na ka bynta ka lawei jong ki khynnah bad ka lawei jong ka ri bad ka jaitbynriew.
“Ka kam nonghikai ka dei ka kam kyntang bad ka long shisha kaba eh bad kaba jwat khamtam eh ban hikai ha ki jaka kyndong jong ka distrik. Ka kam hikai kam dei satia ka kam lum pisa hynrei ka dei ka kam kaba khot ïa ka jinglenlade, ka jingaiti bad ka jingtrei shitom”, ong u kongsan.
U la ong ruh, “Nga kyntu ïa baroh ki nonghikai ba kin trei shitom khnang ban kyntiew ïa ka kam pule puthi hapoh ka distrik. Kumjuh ruh sha ki khynnah ruh ba ki dei ban lap miet ha kaban trei shitom, pule minot bad ban don ka mynsiem jong ka jingsngewrit khnang ba ka lawei ka jong ki kan phyrnai”.
Ha kane ka sngi lehkmen nonghikai, la sakhi ruh ïa ka jingshah pynkup burom ïa ki hynriew ngut ki nonghikai na ka bynta ka khusnam State Award 2023 bad District Award 2023, kaba kynthup ïa u Babu Sisingh Ryntong nonghikai jong ka New Nongstoiñ ‘B’ Govt L.P. School. Katba u Babu Sylvester Syiemlieh, nonghikai jong ka St. Peter’s Higher Secondary School Pyndengrei (Secondary Level) state award, I Babu, Bertila Dkhar Headmistress Mawrang U.P. School (Upper Primary Level) bad I Babu, Celina Shangpliang Head Teacher, Secret Heart RCLP. School (Lower Primary Level), ki la ïoh pdiang ïa ka khusnam District Award 2023.
Kumjuh ruh u Babu Olbestar Kharsyntiew nonghikai jong ka B.P.L Secondary School, Mawphetkhlam, u la ïoh pdiang ïa ka khusnam Best Scout Master. Katba I Babu Daria Ïawren nonghikai jong ka Sibsing Memorial Higher Secondary School Nongpyndeng, I la ïoh pdiang ïa ka khusnam Best Guide Captain.
La ai ïa kine ki khusnam sha ki nonghikai na ka bynta ki kam ratbah kaba ki la leh ha kaba ïadei bad ka pule puthi jong ki khynnah hapoh jong ka distrik, kumju ruh kiwei pat ki kam kiba ki la leh na ka bynta ban kyntiew ïa ka imlang ka sahlang.
La pynbyrngia ïa ka prokram ha kane ka sngi da ki jingrwai, ki drama, ki skit, ka shad tynrai bad kiwei kiwei kaba la shim bynta da ki khynnah jong ki skul kiba pher bapher napoh ka district.
La pynwai ïa kane ka prokram ha kane ka sngi da ka jingkren khublei na u Babu E. Marngar Additional Sub-Divisional School Education Officer, Nongstoiñ bad la bud sa da ka jingïarwai lang ïa ka National Anthem kaba la ïalam da ki khynnah skul jong ka K.J.P. Synod Sepngi Higher Secondary School Nongstoiñ.
