Nongpoh, Jymmang 01: Ka seng United Meghalaya Trade and Labor Union (UMTLU), ha ryngkat ka jingïatrei lang bad ka District Legal Services Authority bad ka ophis jong ka tnad Labour na Ri Bhoi mynta ka sngi ki la pynlong ïa ka jingrakhe ïa kata ka sngi kyrpang ki nongbylla ba la tip kum ka International Labour Day.
Ïa kane ka jingrakhe la pynlong ha Dorbar Hall, Sajer Nongpoh ha kaba la wan ban shim bynta da ki nongbylla sngi na kylleng ka thain Ri Bhoi, ban ïa lehkmen ïa kane ka sngi kyrpang ki nong bylla sngi.
La sakhi lang ruh ha kane ka sngi da ka jingdon lang u President ka United Meghalaya Trade & Labour Union, u Bah Silent Star Rani, u Labor Inspector u Bah Wanbok Khonglah, ka Kong B. Marrai, ka Assistant Legal Aid Defence Counsel (NALSA), ka Kong Q. Mawphniang kum ka ALADC, Free Legal Service/Lok Adalat bad kiwei kiwei ki nongïalam.
Ha kane ka sngi u Bah Wanbok Khonglah kum u Labor Inspector u la kren halor shibun ki kyndon kiba ïa dei ba ka hok ki nongbylla sngi kiba ïa dei bad ka Labor Act. U la pynshai bniah ruh halor ki lad ki lynti ba kum ki nongbylla sngi ki dei ban tip ïa la ka hok bad kum ki nongbylla sngi kim dei ban shah iehbein ha ka kam bylla sngi jongki, ba ka sorkar ka la buh lypa ïa kita ki lad jingïada.
Ka Kong B. Marrai ruh kum ka Assistant Legal Aid Defence Counsel (NALSA), ka la kren shaphang ki ain bad ki lad jingarap (legal scheme) ba ki nongbylla ki dei ban ïoh na ka sorkar bad ka la pynshai ruh halor shibun kita ki lad jingïarap ba ka sorkar ka ai ba kin tip ïa la ka hok bad ruh ba kum k I nongbylla sngi kim dei ban shah khniot beiñ ne shah lehbeiñ haba ki trei bylla sngi.
