Mawsynram, Lber 26 : Ban kynmaw burom ïa ka World Oral Health Day 2025 hapoh ka jylla Meghalaya, ka Mawsynram Community Health Centre ka la rakhe nyngkong eh ïa kane ka sngi kyrpang kum ka jingpynsngewthuh paidbah halor ka jingkoit ka jingkhiah ha ka shyntur halor ka phang, “A healthy mouth is a happy Mind”, ba la pynlong hapoh Mawsynram CHC.
Ïa kane ka program la pynïaid da u Dr. Dondor Nongsteng, Dental Surgeon jong ka Mawsynram CHC kaba don hapoh Mawsynram C&RD Block.
Ym tang kata, la pynlong ïa ka jingïalang ha ryngkat ka jingïashimbynta jong ki 50 ngut ki khynnah skul bad ki nonghikai jong ka Mawsynram Higher Secondary School, ki nonghikai bad kiwei kiwei ki nongïashim bynta kiba la shah khot sngewbha ha kane ka sngi.
Ka kong Candida Myrthong, Dental Assisant ka la ïoh ban pyni paidbah kumno ban lehkhuid ïa ka shyntur da kaba ka la pynpaw bad pyni da ki dur ne da kaba leh (action) sha baroh ki nongïashimbynta kiba la wan sha kane ka prokram ban pynsngewthuh ïa ki ïa ka jingdonkam jong ka jingkoit jingkhiah jong ka shyntur bad ka jinglehkhuid ïa ka shyntur.
Ha kane ka jingrakhe, la ïoh ruh ban sam ïa ki tiar ban sumar ïa ka shyntur bad ki bniat sha baroh ki nongïashim bynta, da u Dr D. Nongsteng, Dental Surgeon ha ka jingdonlang u kongsan u Dr. R. Suchiang, DMO, Mawsynram Block, lem bad kiwei de.
Ïa ka jingïalang la pynïaid da u bahut Zach Sun, BEE, Mawsynram Block bad jingkren khublei na ka kong Dawan Shangpliang, DHP, Mawsynram Block.
