Shillong, Lber 26: Ka Central Bureau of Communication, Shillong dang shen ka la pynlong ïa ka Special Publicity Prokram halor ka Viksit Bharat ha Sohïong, East Khasi Hills District, ban pynsngewthuh ïa ki skhim trei bylla na ka bynta ki nongtrei ki bym don ha kano kano ka kynhun kaba la pynskhem.
Kane ka prokram ka thmu ruh ban pynsngewthuh shaphang ki phang pdeng ba kongsan jong ka Sorkar India, kum ka Swachhata Hi Seva, ka Nasha Mukt Bharat Abhiyan, ka Mission Life, ka Atmanirbhar Bharat bad ka EkPedMaaKeNaam, bad kumjuh ruh ka thong jong ka “Viksit Bharat” ka ri India kaba la kiewshaphrang.
Ka jingïalang ka thmu ban pynshlur ïa ka jingïashim bynta shitrhem ki nongshong shnong bad ban ai jinghikai ïa ki halor kine ki mat ba kongsan jong ka ri. Lyngba ka jingïashim bynta palat 100 ngut ki nongshong shnong, kane ka prokram ka la ai jinghikai shaphang ki skhim treikam bapher bapher.
Ki prokram ba ïadei bad ka bai bam tymmen bad ki jingmyntoi na ka bynta ki kam hapoh ki kynhun bym pat ïoh jingpynskhem ba la pynlong da ka Kong D. Lyngdoh, Labour Inspector na ka ophis Block Labour, Mawphlang bad Kong C. Lyngskor, Manager jong ka Meghalaya Rural Bank, Sohïong.
Ka Kong Lyngdoh, Labour Inspector na ka ophis jong ka Block Labour, Mawphlang, ka la kren shaphang ki jingmyntoi ba ki nongshna jingshna ki lah ban ïoh lyngba ka Meghalaya Building and Other Construction Workers Welfare Board (MBOCWWB).
Ka la batai ïa ki kyndon ban ïoh ïa ka jingpynrung kyrteng bad ki grant bad ki jingmyntoi bapher bapher kiba ki nongtrei kiba la pynrung kyrteng ki lah ban ïoh. Da kaba ithuh ba kiba bun ki nongshong shnong ki hap ha ka kyrdan jong ki nongtrei jingshna, ka la pynpaw ruh ïa ka jingdonkam ban ïoh ïa ka Aadhaar card ban pynsuk ban ïoh ïa ki skhim sorkar.
Ka Kong C. Lyngskor, Manager jong ka MRB ka la ai jingkren ha kane ka jingïalang halor lai tylli ki skhim bai bam tymmen ba kongsan ba la shna kyrpang na ka bynta ki nongtrei ki bym don ha kano kano ka kynhun ba la pynskhem- ka Pradhan Mantri Jeevan Jyoti Bima Yojana (PMJJBY), Atal Pension Yojana (APY), bad ka Pradhan Mantri Suraksha Bima Yojana (PMSBY).
Ka la batai ïa ki jingmyntoi jong kawei pa kawei ka skhim, ki jingnoh synniang kiba donkam, bad ka jingshngaiñ ha ka liang ka pisa tyngka kaba ki ai, da kaba pynshlur ïa ki nongshong shnong ban pynrung kyrteng na ka bynta ka jinglong jingman kaba kham bha ha ka liang ka pisa tyngka ha ki por ban wan.
Ïa kane ka prokram la pynïaid da u Bah JosephasThongni uba la ai jingkren pdiang sngewbha bad batai lyngkot shaphang kane ka prokram. Ïa kane ka jingïalang la plie ruh da u Bah D. Syiemlieh, Rangbah Shnong jong ka Sohïong kum u Kongsan.
Ha ka jingai jingkren jong u, u la pynpaw ka jingsngewnguh ïa ka CBC Regional Office Shillong kaba la pynlong ïa kane ka jingïalang, da kaba ban jur ïa ka jingdonkam jong ka ha kaba ai jinghikai bad pynkupbor ïa ki nongshong shnong.
U la pynshlur ruh ïa ki nongshong shnong ban pyndonkam ïa ki jingmyntoi bapher bapher ba la ai da ka tnad Labour bad ki jaka ai pisa, khamtam eh ïa ki skhim bai bam tymmen na ka bynta ki nongtrei ki bym don ha kano kano ka kynhun kaba la pynskhem.
Ha kaba kut jong kane ka jingïalang, la sam ïa ki khusnam pisa sha ki lahduh jong ka jingïakop shad. Ka Ibadondor Malngiang ka la ïoh ïa ka nam lah duh, bud sa ka Kyntiewbha Kharmuti ha ka kyrdan ba ar bad ka Dollcynia Jana ha ka kyrdan ba lai.
La pynkut ïa kane ka prokram da ka jingkren ai khublei na ka Christina Taipodia na ka PIB Shillong, kaba la pynpaw ïa ka jingsngewnguh ïa ka shnong kaba la pynlong ïa kane ka jingïalang bad pynpaw ka jingsngewnguh ïa ki Resource Person na ka tnad Labour bad ka Meghalaya Rural Bank na ka bynta ki jingïalang ai jingtip jong ki.
