Shillong, Lber 26: Ka sorkar jylla ka la shim ïa ka rai kaba khatduh ban pyndam noh ïa ka CMJ University hadien ba u Myntri Rangbah ka jylla u Conrad K Sangma un sa leit ban ïa kynduh ïa u Lat ka jylla u CH Vijayashankar ha kaba ïadei bad kane ka kam.
Haba pyntip ïa kane u nongai ktien ka sorkar jylla u Bah Paul Lyngdoh u la ong ba ka la don ka jingïakren hapoh ka kynhun jong ki Myntri ka sorkar kaba la long ha ka sngi Balang.
“Ha ka jingshisha ki jingïakren ki la long kiba seisoh bad la ai bor ruh ïa u Myntri Rangbah ban ïakren bad u Lat ka jylla haba ïadei bad ka jinglong jingman bad kaei kaba la jia bad ïa kane la wanrah biang sha ka kynhun myntri,” u la ïathuh.
“Ka jingïakren ha kane ka sngi yn sa rah biang ïa ka jingïalang ka kynhun Myntri kaba nyngkong ka ban long ha u bnai Ïaïong,” pyntip u Myntri.
Haba kylli lano ka sorkar kan khang noh ïa ka university, u Bah Lyngdoh u la ong, “Ngin sa shim ïa ka rai kaba khatduh shisien ba u Myntri Rangbah ka jylla u la kynduh ïa u Lat ka jylla bad ban pynlong ïa ka jingïalang jong ka kynhun Myntri ka ban long ha ka taïew kaba nyngkong ne baar jong u bnai Ïaïong ban ïakren halor kane ka kam khnang ban lah ban shim ïa ki sienjam ha kaba ïadei bad kane ka bynta.”
