Nongpoh, Nailur 17: Kum kawei na ka thong ba la wan rah da u Myntri rangbah ka ri u Narendra Modi halor ka “Ek Ped Maa ke Nam’ ban ai burom ïa ki kmie kiba la don bynta kaba khraw ban tei ïa ka ri bad ka jaid byriew, ka ICAR-NEH-Umïam mynta ka sngi ka la pynlong da ka prokram thung dieng shi bynta halor katei ka thong ba la wan rah da u myntri rangbah ka ri.
Da ki spah ngut ki nongtrei ka ICAR na ki tnad treikam bapher bapher ki la ïa snoh kti lang ban pynlong ïa ka jingthung dieng ban ai burom ïa ki kmie bad ruh shi bynta ka thong ban pynneh pynsah ïa ka mariang, ha kaba ha kane ka sngi ki la lah ban thund da ki spah tynrai u tynrai deing Agro ha phyllaw katei ka ICAR.
U Dr. V.K Mishra, Director ka ICAR haba kren ha kane ka sngi, u la pynpaw ïa ka jingsarong halor shibyn ki bynta ba ki kmie ki la synniang na ka bynta ban tei ne saindur ïa ka imlang ka sahlang bad ruh ba ki don kata ka bynta ha kaba pynneh pynsah ïa ka mei mariang.
U la bynrap ruh da kaba ong, haba pynkynmaw ïa ki jingtrei borbah ki kmie ban saindur ïa ka imlang ka sahlang ha baroh ki liang jong ka jingim ha kane ka sla pythei, kane ka jingthung dieng mynta ka sngi ka long ban ai burom ïa ki kmie jong baroh ki nongtrei ka ICAR bad kum ki nongtrei ka ICAR ki dei ban sngewthuh shai kdar ba ki kmie ruh katkum katei ka thong ‘Ek Ped Maa ke Nam’ ki la synniang shisha kumno ban saindur ïa ka ri bad ka jaid bynriew lyngba ki kam barieh kiba ki la trei kum kita ki kmie.
Namar kata, kum u Director ka ICAR, u la kyrpad ruh sha baroh ki nongtrei ka ICAR ba kin ïa snoh kti lang ban dang ïa trei ryngkat nangne shakhmat ba ka ICAR ka don ïa kata ka thong ban pynneh pynsah bad ban pynlong ïa ki sawdong sawkun da ki rong jyrngam bad ha kajuh ka por u la ai khublei kyrpang ruh ïa ka ophis u DFO, Silviculture Division, Shillong, halor ka jingpyn-biang ïa kitei ki tynrai dieng kaba ki la ioh ban thung mynta ka sngi shi bynta ka thong ban ïada ïa ka mei mariang.
