Shillong, Kyllalyngkot : Ka Dalmia Cement ( Bharat) Limited , ka kompeni dewbilat kaba ïaid ïew bha ka dei kaba mih na ka longïing jong ka Dalmia Bharat Limited, mynta ka la ïaid ïa ka lynti kaba 10 snem kynthih ha ka jingshakri jong ka ban pynbiang ïa ki jingdonkam ki paidbah ha ka thaiñ shatei Lam Mihngi.
Ha ki 10 snem kiba la dep ka Dalmia Cement ka dei kaba ïaid ïew tam bad ka dei ruh kaba pynmih bun tam ki dewbilat ha North East bad ka synñiang ruh ha kiba bun ki bynta na ka bynta ka jingroi jong kane ka thaiñ.
Kane ka kompeni kaba don ïa ki tylli kitei ki karkhana bad ki grinding unit ka Dalmia Cement ka dei kaba la lah ban pynmih bun tam ka dewbilat kaba haduh 4.4MnT ha ka North East. Ka kompeni ka la lah ruh ban ai kam ai jam kumba 5000 ngut ki briew bad ka la lah ban pynkylla ïa ka rukom im jong ki shi lak ngut tam ki briew.
Ha kane ka thaiñ ka dei ruh kaba sted bha ban sdang ïa ka Green Cement lane ka dewbilat kaba lait na ka jingpynjaboh ïa ka mariang bad ka la buh thong ba ha u snem 2040 kan lah ban pynmih ïa ka dewbilat kaba lait na ka Carbon bad ka la lah ruh ban saiñdur ïa ka shlem treikam jong ka khnang ba kan ym don kano kano ka jingktah ïa ka mariang. Ka kompeni ka dei kaba ka la don bynta ha ka ban shna ïa ki jingtrei kiba heh kum ka jingkieng Dhola-Sadiya, ka jingkieng Bogibeel bad ki jaka hiar liengsuiñ jong ki shipai Indian Air Force kumjuh ruh ki surok ha kylleng ki bynta jong ka ri khamtam ha ki thaiñ khappud.
Haba kren ha ka sngi ba ka Dalmia Cement ka la kynjoh sha u mawmer ba shiphew ha ka Thaiñ shatei Lam Mihngi hynne ka sngi u nongaiktien jong ka kompeni u la ong “Ngi sngewsarong ïa ka lynti ïaid kaba ngi la ïaid ha kane ka thaiñ shatei Lam Mihngi ha kine ki 10 snem kiba la leit, na ka karkhana kaba nyngkong eh kaba ngi la sdang ha u snem 2012, ngi la kylla long kum ka kompeni kaba ïaid ïew tam ha ka thaiñ, ngi la ïaid kham shakhmat. Ka kompeni ka la pynmih ïa ka dewbilat kabab ha bad ka poi ruh ha manla ki kyndong kynshrot jong ka thaiñ, ka la ïoh ïa ka jingïaroh, ka jingshaniah bad ka burom na ki million ngut ki nongshong shnong jong ka North East, ngi ai khublei ïa ki paralok jong ngi, ki nongshong shnong kiba kyrshan ïa ngi haduh ba ngi la lah ban poi sha une u mawmer”.
Kum ka dak ka jingrakhe ïa ka jingdap 10 snem jong ka, ka Dalmia Cement ka la pynlong ïa ka jingsam khusnam kaba shisien shisnem kaba la tip kum ka ‘Dalmia young Achievers Award’ ha kaba la jied 10 ngut ki samla donsap na baroh 7 tylli ki jylla jong ka thaiñ Shatei Lam mihngi ba kin ïoh pdiang ïa ka khusnam. La jied ïa ki katkum ki sap kyrpang ba ki don kum ha ka jingïalehkai Sports, ha ki kam ai jingsumar, ki kam pynwandur pynitynnad, ki kam khaïi bad ki nongseng kam seng jam.Ki la don baroh shiphew ngut kiba la ïoh pdiang ïa kane ka khusnam.
Haba kren khyndiat khynsoit halor ka khusnam ba la sam, u nongaiktien ka kompeni u la ong “Nga ai khublei bad kitbok kitrwiang ïa baroh kiba la ïoh ia ka khusnam mynta ka miet, ngi ïoh mynsiem ban ïohi ïa ki khun samla kiba long ka nuksa ba bha ha ka thaiñ ka dong jong ki, lyngba kane ka khusnam ngi kyrmen skhem ban gin dang lah ban bteng ban kyntiew ïa ka sap ka phong jong kine ki khlur donsap.
La seng ïa ka Dalmia Cement ha North East ha ka 12 tarik u Kyllalyngkot 2013 bad manla u snem ha kane ka sngi rakhe ïa ka lyngkhuh sngi jong ka , la ju sam khusnam sha ki samla donsap.
