Shillong: K’lyngkot, 13: U Myntri Khynnah ka Sorkar Pdeng uba peit ïa ka tnat Skill Development and Entrepreneurship and Electronics & Information Technology u Rajeev Chandrasekhar ha ka sngi Thohdieng u la kynnoh ba ka All India Trinamool Congress (AITC) ka la shim kabu ïa ki paidbah nongshong shnong ka jylla Meghalaya kaba khlei bun ki jingkular.
U la kynthah tyngeh ruh ïa ka AITC kaba la pynphriang ïa ki khubor lamler pyrshah ïa ka BJP da kaba airong ba ka dei ka party kaba ñiew shiliang ïa ki kynhun ritpaid.
Haba kynthah ïa ka jingkular jong ka AITC ban pynkha palat 3 lak tylli ki kam sha ki samla ka jylla Meghalaya, u Chandrasekhar u la ong ba ki samla ka West Bengal ki la mad ïa ka jingjynjar namar ka AITC.
Ka West Bengal ka duna bha ki kynhun shimet kiba sengkam. Tang ha ka Technology bad Electronics la lah ban pynkha haduh 18 lak ki kam ba thymmai hapoh shi snem hynrei ym don mano mano ruh ba nud ban sengkam ha West Bengal.
“Ka long kaba suk ïa kano kano ka seng saiñpyrthei ka bym don jingthoh halor ki kam pynroi, ka bym don jingthoh halor ka jingtreikam bad ban shu khlei ïa ki jingkular. Kine ki dei tang ki jingkular ba thylli,” u la ong.
“Kine ki juh ki jingkular ba ki la khlei ha West Bengal, ki la khlei ruh ha Goa ha kaba ki paidbah ki la kyntait ïa ki la bunsien namarba ki tip ba ki dei tang ki buit shim kabu saiñpyrthei jong kane ka party,” u la bynrap.
U Chandrasekhar u la ong ba ka AITC ka la long kum ka ‘nongshim kabu ha ka saiñpyrthei, katba ka BJP ka long kum ka nongplie lad ïa ka lawei jong uwei pa uwei u nong India bad manla u nongshong shnong jong ka Meghalaya.
“Ka party jong ngi, ka dei ka party kaba leh da ki kam bad kumba u Modi u la ong ngin tei ïa ka India bathymmai, ngi la trei ban tei ïa kane ka India bathymmai, ngim shym la wan tang ha ka por elekshon, ban kular bad ban shu jngai rngai hadien ka elekshon bad ban khlei biang ïa ki jingkular ynda la wan ka elekshon,” u la ong.
Haba kynthah ïa ka TMC bad ïa kiwei kiwei ki party kiba shong ha ka liang pyrshah bad kiba pyrshang ban pyntieng pynsmiej ïa ki kynhun Khristan da kaba pynphriang jingtip ba lamler shaphang ka BJP, une u Myntri Khynnah ka Sorkar Pdeng u la ong kane ka jia namarba ki don ki seng saiñpyrthei kiba shim kabu kum ka TMC ka bym lah ban ïakhun pyrshah ïa ka BJP ha ka jingwanrah ïa ki kam pynroi.
U la ong ruh ba kine ki jingshukor ki la paw pyrthei namarba ka BJP bad u Narendra Modi ki ngeit ha ka ‘Sabka Sath Sabka Vikas’ ba manla uwei pa uwei kin roi kin pa.
“Namarkata, kam don kano kano ruh ka jingshisha halor kine kumba la kynnoh da ki party shim kabu kum ka TMC ba ka BJP ka dei kaba long pyrshah ïa ki paidbah,” u la ong shuh shuh.
Halor ka jingkynnoh ba ki paidbah ka Meghalaya kim pdiang satia ïa ka BJP u Chandrasekhar u la ong, “kata ka long markhongpong. Nga ngeit ba ki paidbah ha ka ri kynthup ruh ïa ki jylla ha kane ka thaiñ Shatei Lammihngi kynthup ruh ïa ka Meghalaya kiba la shah ieh beiñ ha ki kam pynroi, ha ka pule puthi, ha ka jingplie lad ïa ki jingai jinghikai bad ha ka khih ka kamai hynrei mynta hapoh ki jingïohi jngai jong u Modi ban pynlong ïa ka India kaba thymmai, bun ki lad kin sa wan.”
