Mawthadraishan,K’lyngkot 13: U MLA jong ka Mawthadraishan Constituency bad Myntri ka sorkar jylla, u Bah H.Brolding Nongsiej ha ka sngi thohdieng, ula plie paidbah ïa saw tylli tylli ki surok Shnong ha ka jingïalang kaba la pynlong ha madan Shnong Tengri, kiba ka jingmang pisa na ka bynta kine ki surok ka long 47 klur tyngka tam.
Ha kane ka jingïalang la ïadon lang ruh Executive Engineer Ka PWD Mairang u Bah L.Shabong,u SDO PWD Mairang u Bah Kitbok Rymbai nangta u SDO PWD ka Nongkasen u Bah D. Lamare, ki Sordar bad Nongkitkam Shnong bad ki paidbah.
Kine ki saw tylli ki surok kiba la plie paidbah ha kane ka sngi ki kynthup ïa ka surok na Dewsaw – Tengri , Nongshillong -Jakrem , Nongshillong – Domkseh bad ka surok Kynshi – Myriaw.
Haba ai jingkren ha kane ka jingïalang u bah Brolding Nongsiej ula ai khublei ïa ki sordar bad ïa ki nongkitkam jong ki 22 tylli ki shnong kiba la shah khot sngewbha ha kane ka sngi ban ai mynsiem ïa u bad ula pynpaw ruh ïa ka jingsngewkmen ba ka Constituency ka don hapdeng ka jingshong suk shong saiñ bad kane ka sngi ka long ka sngi jong ka jingsah jingkyn maw ïa kaba ki la ïoh ban pynurlong ïa ka ban plie ïa kine ki Mawnongrim.
U Bah Nongsiej ula ong ruh ba ka jingthmu ban plie ïa kine ki Surok ka lah dei naduh ka sngi shwa ban dep tei ïa kine ki surok hynrei na ka daw jong ka jingwan lyngshop jong ka khlam COVID-19 la pynsangeh noh bad hadien jong kane ka lah don ka jingkynthoh na ki liang pyrshah (political party) da kaba ki ong ba u MLA um ler kam bad ba um ju don mawkyrteng hangno hangno ruh hynrei ha kane ka sngi ula pynshai sha ki paidbah ba um don jingsngew eiei ruh halor kane ka jingkynthoh namar ba u Mawnongrim u shu long tang u dak jong ka jingsah jingkynmaw ïa ki kam ,ka nam bad ka burom, bad ula ong ruh ba ym dei tang saw tylli ki surok ki ban hap buh Mawnongrim hynrei da kiba bun bah ki surok kiba khlem pat buh Mawnongrim bad bun bah ki skhim ki bym pat lah ban plie hynrei um treh ban leh kumta namar ba um kwah ïa kata ka nam ka burom bad ba ki paidbah hi ki tip ba u Mawnongrim ka dei ka surok kaba ki ïaid ki ïeng man ka sngi kaba pynsuk ïa ki ha ka leit ka wan.
Shuh shuh ula kyntu ruh ïa ki nongshong shnong jong ka shnong Tengri ba kidei ban don ka mynsiem sngew sarong namar ba watla kadei ka shnong kaba rit duh hapoh Konstitwensi hynrei kala sei pat ïa u nongmihkhmat, ïa u minister, uba la wanrah ïa ka roi ka par ha kane ka shnong.
Kiwei pat kiba la kren ha kane ka jingïalang ki kynthup ïa u Executive Engineer PWD Mairang u Bah L. Shabong, bad kumjuh ruh na ki katto katne ki Sordar.
