Shillong, Risaw 22: Ka Balang u Blei (M&A), Nongthymmai Pohkseh ka la rakhe ïa ka 16th Music Seminar bad ban rakhe ïa ka jingdap 100 snem jong ka jingrwai shem mynsiem kaba la pynlong ha ïingmane jong ka Balang u Blei, Nongthymmai Pohkseh naduh ka 18 tarik bad la pynkut noh ha ka 20 tarik Risaw 2024.
Ha kane ka sngi da ki spah ngut naduh ki heprit, ki samla, ki rangbah ki thymmen ki la poi lang ha ka jingïaseng jingdap 100 snem bad la wan ban don bynta lang u CEM ka KHADC u Bah Pynïaid Sing Syiem.
Ha ka jingïaseng mynstep, la ïalam da I Bah Shotspingland Lyngdoh, la rwai da ka Jingïaseng Samla District Rilum Pdeng Khasi bad la ai jingkren da I Rev. Wenry Lyngdoh.
Ha ka jingïaseng ha ka por 1:30 mynsngi, la pynshongshit ïa ka jingïaseng da ki jingrwai na ka Music Ministry, Jingïaseng Samla (Youth Development) Balang u Blei (M&A), Jingïaseng Samla Balang U Blei District Mawsynram, Jingïaseng Samla Balang U Blei Nongthymmai bad la ïoh ïa ka jingkren na I Rev. Dr. S. D. Kharmawphlang bad la ïoh ruh ia ka jingduwai ha ka ktien Pnar da iwei I samla iba wan na Jaiñtia Hills.
Ha ka jingïaseng miet naduh ka por 5:30, la ïalam ïa ka jingïaseng sa I Evangelist Meshak Suja, bad la ïoh ïa ka jingrwai na ka jingïaseng samla Balang u Blei Mawryngkneng bad ka Member Music Ministry Committee bad la ïoh ïa ka jingkren na I Dr. C.M.R. Sawkmie.
