Kular u EE ka PWD NEC Khliehriat Division shna pynbha noh ïa ka jingkieng Um-su-wai

Khliehriat, Risaw, 22: Ki nongïalam jong ka Jaiñtia National Council (JNC) Hynñiew Shnong Circle ha ka sngi Baar hapoh ka jingïalam jong u Secretary Art & Culture u Bah Mehi Rymbai ryngkat lang u President jong ka JNC Hynñiew Shnong Circle u Bah bah Wishes Siangshai ki la leit ban iakynduh ïa u Executivte Engineer jong ka tnat PWD NEC Khliehriat Division u Bah M. Kharnaior ban buddien ïa ka jingdawa ban maramot pynbha ïa ka jingkieng Um-su-wia kaba don ha ka shnong Moolamanoh, East Jaiñtia Hills District.
Halor kane ka jingdawa, ka JNC Hynñiew Shnong Circle ka ladep ban leit buh jingthoh ha ophis PWD naduh ka 6 tarik, Nohprah 2023 bad ha ka sngi Baar ki la leit ban buddien biang ïa kane ba ka seng kan dup ioh ïa ka jingpynshai na utei u heh sorkar jong ka tnat PWD.
Kum ban shu pynkynmaw na ka liang ka seng ka lah dep ban buh ruh bun tylli ki jingthoh wat shaduh ki bor kiba halor myn ha ki snem ba lah leit bad dawa ban maramot noh ïa katei ka jingkieng kaba lah jot lah pra bad kaba buh jingma ruh ïa ka leit ka wan jong ki paidbah khamtam ki paidbah nongshong shnong jong ki hynñiew tylli ki shnong kiba dei ban iaid lyngba na Rymbai Road bad poi sha katei ka jingkieng bad ban poi sha ki shnong ba ki shnong ki sah.
Katei ka jingkieng ka don ka jing jrong kumba 140mitar, ka dei ka jingkieng (PWD) kaba jrong tam ha East Jaiñtia Hills District bad ka pyniasoh ïa ki shnong ba kynthup ka shnong Moolamanoh, Mulang, Musniang, Musniang Rim, Moo-Nongtdu bad Lumputhoi nalor ki San Shnong kiba kynthup ïa ka Mutong, Cham Cham, Lum Shyrmit, Mukhaialong bad Pynthorsale, hadien kata kane ka surok ka poi bad pynïasoh ruh bad ka Surok bah National Highway NH-6 ha Kongong.
Ha ka jingiakynduh bad u Execitive Engineer, ka seng ka lah ioh ïa ka khubor kaba sngewtynnad bad ka khubor ba bha ha kaba u EE u la pyntip ba na ka liang ka tnat PWD dang myn ha kane ka 14 tarik u risaw ka la dep pynbna paidbah da kaba khot tender ban sdang ban shna noh ïa katei ka jingkieng Um-Su-Wai bad ka sorkar kala pynbna ruh ïa ka mang tyngka kaba T 19.20 klur tyngka ban maramot bha ïa katei ka jingkieng bad ïa ka por ban pyndep ïa ka jingpyntrei la buh thong ban pyndep hapoh ka 24 bnai, kata naduh ba la pynmih ïa ka order bad shen ka tnat kan sa pynmih noh kham kloi ruh ïa ka Final Work Order, shuh shuh u EE u la ong ba ka tnat kan sa ialeh ban pynmih ïa ka Final Work Order ha ka taiew ba nyngkong jong u bnai nohprah 2024 ban dup ioh ban shna noh kloi ïa ka jingkieng” ong u kyrwoh na ka seng.
Ka Seng ka dap da ka jingsngewnguh ïaka tnat PWD Khliehriat halor ka jingshimkhia ka jong ka ban pynurlong ïa katei ka kam kaba long ka jingangnud jong ki paidbah jong ki hynñiew shnong kaba ki la ap khmih lynti da ki phew phew snem bad ka seng ka ai khublei ruh ïa u Bah M. Khar-naior namar ka jing-shimkhia ka jong u halor katei ka kam naduh ka jingsdang ka jingdawa jong ka seng, pynkut u kyrwoh.