Nongstoiñ, Risaw 22: Katkum ka jingbthah jong ka Ïing Kashari jong ka jylla ka Meghalaya High Court ba don burom, u bah Garod LSN Dykes IAS District Magistrate ka West Khasi Hills, mynta ka sngi u la pynmih da ka hukum katkum ka kyndon 163 jong ka BNSS 2023, ba la khang pyrshah ban bret pathar ïa ki tiar shna ïing kum ka dew bilat, mawria, shyiap bad kiwei kiwei harud ki surok paitbah kiba lah ban buh jingma bad pynthud ïa ka jingïaid ki kali bad ïa ka ïaid ka ïeng jong ki paitbah.
Kino kino kiba pynkheiñ ne ïaleh pyrshah ïa kane, kin ngat ha ka jingshah pynshitom ha ka aiñ BNSS Act 2023 bad ki aiñ kiba ïadei bad ka mariang. Ïa kane ka hukum la pyntreikam naduh mynta ka sngi, hynrei lada ki don kino kino kiba shem jingeh halor kane ka hukum, ki lah ban pan jingbit ban pynjlan ne pynkylla ïa ka por na ki bor ba dei pei ïa kane ka bynta.
