Shillong, Risaw 22: Ka khubor ba la ïoh na ki pulit la ïathuh ba ka Miko Kaur ka la phah ka jingujor ba ha ka 17 tarik mynta u bnai, ki runar bym lah ban ithuh ki la prong hapoh ka ïing jong ka kaba ha Harijan Colony, Ïewduh, Shillong bad ki la tuh ïa ki jingdeng ksiar. Na ka liang jong kane kaba la ujor ka la ong ba la suba jur ba dei uwei na ki nongshong shnong uba donkti ha kane ka kam runar.
Ha kawei pat ka jingjia na ka liang ki pulit ki la ïathuh ba u Waltrynight G Momin u la phah ka jingujor ba ha ka 18 tarik mynta u bnai ha ka por kumba 3 baje mynstep, ki runar bym lah ban ithuh ki la tuh ïa ka scooter jong u kaba don u nombar ML-07C-2678 na ka shnong Rangmalgre kaba ha Rongsak OGC (EGH).
Shuh shuh na ka liang ki pulit ki la ïathuh ba u Joel Thangmuanlun u la phah ka jingujor ba ha ka 15 tarik mynta u bnai, ki runar bym lah ban ithuh ki la prong hapoh ka ïing jong u kaba ha ka shnong ha Kathalbari (WGH) bad ki la tuh ïa kawei ka Laptop kaba shongdor kumba T. 20,000/-.
