Shillong, Naiwieng 26: Ka Raj Bhavan, Shillong mynta ka sngi, ka la pynlong ïa ka jingrakhe ïa ka Sngi Ka Riti Synshar ka Ri ne Constitution Day, kaba la tip ruh kum ka ‘Samvidhan Divas’, kum ka dak jong ka jingpdiang ïa ka Riti Synshar jong ka ri India da ka Constituent Assembly ha ka 26 tarik u Naiwieng 1949.
ïa katei ka jingïalang, la ïalam da u Lat ka Jylla u Phagu Chauhan bad ka Lat jong ka Jylla Manipur ka Anusuiya Uikey bad ha kane ka jingrakhe la wan ban ïa shim bynta lang da ki ophisar bad ki nongtrei jong ka Raj Bhavan.
Ki nongïa shim bynta kila shim smai ha kane ka sngi bad pule eh ruh ïa ka Preamble ban pynthikna ïa ka jingïeng skhem ka jongki halor ki nongrim kiba la kynthup ha ka riti synshar ka ri, kaba dei ka kot kaba khlaiñ tam.
Ha u snem 2015, u Myntri Rangbah duh ka ri u Narendra Modi ula pynbna ba ka 26 tarik u Naiwieng kan dei ka Constitution Day bad ula buh ruh ïa u maw nongrim ban tei ïa u motdur sahnam jong u Dr BR Ambedkar Statue of Equality Memorial ha Mumbai.
Katei ka rai kaba la shim, ka dei ruh kaba ïahap bha bad ka jingrakhe ïa ka lyngkhuh sngikha kaba 125 snem jongu Dr Bhimrao Ambedkar, u nongpynwan dur ïa ka riti synshar ka ri India.
