Pyrshah ka KHNAM ban rejistar ïa ki shipai ba shongthait na Manipur ha ka Meghalaya ZWD
Shillong, Naiwieng 26 : Ka Khun Hynniewtrep National Awakening Movement (KHNAM) ka la ujor pyrshah halor ka jingrejistar ïa ki shipai (ex-servicemen) na Manipur bad kiwei pat ki jylla da ka Meghalaya Zilla Welfare Department.
Ha ka shithi sha u Secretary GAD, Cyril VD Diengdoh ha ka 24tarik mynta u bnai, u General Secretary ka KHNAM, Bah James MA Neng u la ong, “Ngi la ïoh jigntip ba ka ZWD ka la bahkhlieh lang na ka bynta ka bha ka miat jong ki shipai ba la shongthait na kiwei pat ki jylla bad pynduh noh pat ïa ka bhah jong kito kiba dei na kane ka jylla. Tang na ka dawe ba u Zilla Sainik Welfare u dei na Manipur kam dei satia ka daw ban knieh noh ïa ka hok jong ki shipai ba la shongthait kiba dei na kane ka jylla katkum ki kyndon bad ka thong jong ka Kendra Sainik Board.”
Shuh shuh u ong ruh ba la pyntip ïa ki ba ka ZWD kaba dei ka subordinate office hapoh ka GAD ka la rejistar ïa ki shipai ba la thongthait kiba dei na Manipur.
“Ngi dap da ka jingsngewsih halor ka jingjia ha Manipur bad ngi duwai ruh na ka bynta ka jingsuk bad ka jingshngain ha katei ka thain. Hynrei tang na ka dawe ka jingumsnam ha katei ka jylla, ngi la ïohpdiang pat ïa ki khubor ba ka la don ka jingbun ki shipai ba shongthait na Manipur kiba rejistar ha ka Meghalaya Zila Sainik Department.
Ha kawei ka liang, ki shipai ba la shongthait na Mnaipur ki la dei ban rejistar ha ka jylla jong ki khnang ba kin lah ban ïoh pdiang ïa ki jingmyntoi kiba la ju ai na ka por sha k apor ha ka jylla jong ki hi,” u la ong.
Utei u nongïalam ka KHNAM u ong ruh ba ka Kendra Sainik Board ka la kdew ban thaw ïa ka Department of Sainik Welfare na bynta kawei pa kawei ka jylla bad UT na bynta ban peit ïa ka bit ka biang jong ki shipai ba la shongthait ha ka jylla jong ki hi..
“Ka daw tynrai kaba ngi pyrshah ban rejistar ïa ki shipai ba la shongthait kiba dei na Manipur lane na kiwei ki jylla ha ka Meghalaya Zila Welfare Department kadei namar ngi la don lypa bun na ka jylla kiba la phaikhmat sha ka Zilla Welfare Department na bynta bun ki jingmyntoi la ka long ban ïoh kam biang lane kiwei pat ki jingmyntoi kiba ju ai na ka por sha ka por.