Shillong, Naiwieng 26 : Uwei u rangbah ba tip kyrteng kum u Avner Medon Pariat ha ka sngi U Blei u la pynrem jur ïa ka Khasi Hills Autonomous District Council khamtam ïa u Chief Executive Member halor ka jingkynnoh ba ka don ka jingkhñiot ïa ka hok jong u Chanlok Dkhar uba kwah ban pynpaw ïa ka hok laitluid jong u ban kren halor ka jingsuba ba ka don ka jingbamsap ha ka Council.
Ha ka kyrwoh, u Bah Avner uba dei ruh uwei na ki politishan bad nongthoh u la ong, “U Bah Chanlok u dei u nongshong shnong kum manga uba kwah ban wanrah ïa ki ishu kiba u sngew ba ki dei kiba ktah ïa ka imlang sahlang bad ka jingpynkheiñ ïa ki synshar khadar ha ka lynti kaba dei.
“Ka long kaba sngewsih ban ïohi ba ka KHADC ka la ai pynban da ki bor ka aiñ ha ka jaka ban pynshai ne pynbeit ïa kitei ki ishu ba la kdew bad kane ka la wanrah pynban ïa ka jingbym sngewtynnad na bynta kito kiba kwah ban kdew bad pyni lang katkum ka synshar laitluid kaba ka imlang sahlang jongngi ka burom bha,” u la ong.
Shuh shuh u la ong ba ka Council ba kadei ban pyrkhat arsien halor katei ka rai bad ba kadei ban wanrah da ka rukom trei kaba khuid bad shai bad ka jingkloi ban syllok ban pynbeit ïa itei ki ishu ba la kdew.
“Ka jingkhñiot noh da ka bor ka pynïap noh ïa ka jingmut jong ka synshar laitluid bad ka jingshaniah jong ki paidbah ha ki jaka synshar paidbah,” u la bynrap biang.
