Nongpoh, Naiwieng 26: Ki nongïalam ka Hynniewtrep Achik National Movement (HANM), Western Zone mynta ka sngi ki la pynpaw ïa ka jingsngewkhia kaba jur ïa ka jingkuman jong ka sorkar Meghalaya ban tuklar halor ka jingpyntrei ka Sorkar Assam ïa ka surok hapoh ka shnong Baghlapara kaba hap hapoh ka Hima Nongspung.
Ka HANM, Western Zone ka la pynpaw ïa kane halor ka jingnang ïaid shaid shaid ka jingtei ïa u surok ha ka shnong Baghlapara kaba hap hapoh ka Hima Nongspung, Raid Warmawsaw ,kaba la tei da ka tnad PWD Assam ha ka jinglut ka T.71.59 lak ïa ka surok ba 1.203 kilometer.
Haba pyntip ïa kane, u Samla Sumar Lyngdoh, president ka HANM, Western Zone, u la ïathuh ba ka seng ka dap da ka jingsngewkhia namar ka jingkuman jong ka sorkar Meghalaya khamtam ka Regional Committee kaba dang pynkhreh ïa ka jingïakren pynbeit pud ban tuklar halor kane ka kam trei surok jong ka Assam ha ka shnong Baghlapara kaba la nang ïai trei bad sah ban pyndep syndon ïa ka.
U la ïathuh ruh, ba watla kiba bun balang khamtam ki bor ka Hima Nongspung ki la dep ban dawa na ka sorkar Meghalaya ba kan tuklar lem halor ka jingïai kyntur pud jong ka Assam da kaba pynbiej da ki kam pynroi ha ki shnong khappud kum ka jingtei ia ki surok bapher bapher khamtam hapoh ka shnong Baghlapara, hynrei la sakhi ba haduh kine ki kynti kam shym la don satia kano kano ka jingshimkhia na ka liang ka sorkar Meghalaya.
“Kaba sngew lyngngoh ka long ba ka sorkar Assam ka la nud ban pynkheiñ ïa ka soskular ba la ïasoi ban pynsangeh shwa ïa ki kam pynroi ha ki shnong khappud jong ki ar jylla katba ki jingïakren pynbeit pud ka dang ïaid shakhamt”, ong u Samla Sumar Lyngdoh da kaba kyntu ïa ki bor ka sorkar Meghalaya ba kan phaikhmat mardor halor kine ki kam kyntur pud ka Assam ha ki jaka jong ka jylla Meghalaya.
