Rakhe donburom ka ophis u DC -EJHD ïa ka sngi kyrpang jong ka Meghalaya ‘51th Meghalaya Day’
Khliehriat,K’Lyngkot 22: Ka ophis u Deputy Commissioner ka East Jaiñtia Hills District hynnin ka sngi saitjaiñ ka la rakhe donburom ïa ka sngi kyrpang jong ka jylla Meghalaya kaba 51 snem, kaba la tip kum ka 51st Meghalaya Day, ïa ka prokram la pynlong ha Conference Hall ha ophis u Deputy Commissioner ha Khliehriat ha ka jingïadon ryngkat lang ki heh sorkar na ki tnat bapher bapher.
Haba kren kum u kongsan, u Deputy Commissioner ka East Jaiñtia Hills District, u Abhilash Banarwal, IAS u la ong ba kane ka jingrakhe ïa kane ka sngi kyrpang ‘Meghalaya Day’ ka dei kyrpang ban kynmaw burom ïa kito kiba la len ïalade kiba la ïakhun na ka bynta ki hok jong ka jylla ban phai dien sha ki nongrim ha kito ki por ba ïakhun ban ïoh jylla ba pura ha kaba ka jylla Meghalaya ka donkam ban dang ïai kyntiew “Kum u shakri sorkar bad uba uba ju noh syniang ha ka im lang ka sah lang ngi dei ban pyrshang shuh shuh ban pynwandur ha ka rukom kaba dei” ong u Deputy Commissioner.
Haba kren halor ka phang ban pynneh pynsah ïa ka mei mariang, u kongsan u la pynpaw ïa ka jingdonkam ban kyntiew ïa ka jingnang jingstad, ban hikai ïa ki briew ha ka khaïi ka pateng, ban pynshlur ruh ïa ki samla ha ka kam khaïi kumjuh ruh ban bsut ha ka jingmut jingpyrkhat jong ki khun ki kti ba ki dei ban don ka jingthmu ban poi sha ka thong ha ka jingim.
Kumjuh ruh u Abhinav Kumar Singh, IAS, DSO (Sadar), East Jaiñtia Hills District, u la ong ba kane ka jingrakhe sngi kyrpang ka jylla ka long kaba donkam haduh katta katta bad ka dei ruh ka sngi sah jingkynmaw ïa kito ki nongïalam kiba khraw bad kynthup ruh ki riew shimet bad ki kynhun bapher bapher kiba la noh syniang bor bah ha kaba ngi mynta ngi ioh kane ka lad ban ïoh ïala ka jong ka jylla ba pura.
Kiba la ai jingkren ki kynthup ruh ki Additional Deputy Commissioner ka East Jaiñtia Hills District, u bah G.Warjri, MCS bad u bah A.Nongbri,MCS, u Waheh Shnong Khliehriat West, u bah Langmon Bareh, u DDMO, East Jaintia Hills District, u bah D.Lyngdoh Khliehriat, u ARO, u V. Sangma, la pynbyrngia ïa ka prokram da ki jingrwai tynrai na ki khynnah jong ka Jaiñtia Eastern College Khliehriat.