Pyrto u DC ka SWKH ïa ki nongïaleh Hill State ha ka jingrakhe dap 51 snem ka Meghalaya

Mawkyrwat, Kyllalyngkot, 22: Ka South West Khasi Hills District mynta ka sngi ka la rakhe ïa ka lyngkhuh snem ba 51 jong ka jylla Meghalaya hapdeng ka jingishongkun ha ka jingïalang ba la pynlong ha Hall jong ka Maharam Government Higher Secondary School, Mawkyrwat ha kaba u bah T. Lyngwa, IAS, Deputy Commissioner, South West Khasi Hills District u la long u kongsan.
Haba kren ha kane ka jingrakhe, u bah T. Lyngwa, IAS, Deputy Commissioner, South West Khasi Hills District, u la pynkynmaw ïa kiei kiei kiba la jia ha ki snem ba la leit noh shwa ba Meghalaya kan ïoh ïa ka jylla ba pura namar ha kita ki por ki la don shibun ki jingjia ha kaba ki paidbah ki ïa kynduh buh ki jingeh la ka long ha ka bam ka dih, ka ïoh ka kot bad kiwei de.
Kumta, u la pyrto ruh ïa ki nongïaleh ban pynïoh ïa ka jingjylla ba pura ha kato ka por kiba la aiti lut met bad mynsiem na ka bynta ban ïakhih ban ïoh ïa la ka jong ka jylla ba pura bad lyngba ka jingïakhih jong ki kaba khlem da ïa umsnam bad ha ka lynti kaba jai jai. Ha kajuh ka por ula ong ruh ba naduh ba ka Meghalaya ka la ïoh la ka jong ka jylla ka la kiew stet lajan ha baroh ki liang bad ymtang hapoh jong ka Jylla hynrei ha ka Ri India baroh kawei ka la long kaba kiew watla ngi don ha la ki jong ki jong ki jait. Namarkata, u kyntu ïa ngi ki longdien ban bud ïa ka nuksa kaba ki khraw pyrkhat ki la iehnoh shadien da kaba ngin im ka jngim kaba palei bad ban ïa long kawei namar ngi im ha ka ri kaba ïakhleh bad bun jaid ki jaidbynriew.
U la ong ba ka jingrakhe ïa kane ka lyngkhuh snem jong ka jylla kam dei ban shu kut noh tang ha ka jingrakhe hynrei ka dei ban pynkhlaiñ ïa ka mynsiem jong ka jingtrei shitom, ka jinglenlade khnang ba ngin ïa ryngkat kyrdan bad kiwei. U la pynkynmaw ruh ba kam shym la long ka kam kaba suk na ka bynta ki nongïakhih pynïoh jylla ha ka jingïaleh jong ki na ka bynta ban pynïoh ïa ka jylla Meghalaya, hynrei kaba donkam ka long ba baroh ba kin shim ka rai ban aiti lut ïa lade bad ban trei shitom na ka bynta ban pynïoh ïa ka roi ka par khnang ba ka jylla Meghalaya kan ïohi ïa ka jingkiew ha baroh ki liang.
Ïa kane ka prokram la pynshit pynshngaiñ da ka jingrwai bad ka drama lyngkot na ki khynnah skul jong ka JNV, South West Khasi Hills District, Mawkyrwat.
Ïa ka jingïalang ha kane ka sngi la pynïaid da ka kong Dawankmenlang Lyngdoh, Programme Manager na ka ophis jong u Superintendent of Fisheries, South West Khasi Hills District katba u bah M. Diengdoh, MCS, Additional Deputy Commissioner, South West Khasi Hills District u la ai ka jingkren pdiang sngewbha bad u bah K.T. Nongsteng, MCS, Assistant Commissioner, South West Khasi Hills District u la ai ka jingai khublei pynwai.