Mawkyrwat, K’lyngkot, 22: Ka Sarin Sports Club hadien ba ka la lah ban pynliem noh ïa ka Nongkynbah Sports Club da 3 la 1 set ka la long ka lahduh ha ka lympung ïalehkai phainal jong ka 4th South West Khasi Hills District Level Invitation Volleyball Tournament 2023 ba la pynïaid da ka South West Khasi Hills District Volleyball Association ryngkat ka jingïatreilang bad ka ophis jong u District Sport Officer (DSO), South West Khasi Hills District ba la pynlong hajan jong Madan MDSA Mawkyrwat.
U bah John F. Kharshi-ïing, Working President jong ka Meghalaya State Olympic Association (MSOA) u la long kum u kongsan ban wan ban pynhap ïa lama jong kane ka lympung ïalehkai Vollyball ha Mawkyrwat bad ha kane ka sngi u bah John F. Kharshi-ïing u la ai copy ha ka South West Khasi Hills District Volleyball Association ïa ka copy jong ka Sport Policy 2019, ha kaba u la ong khatduh khatwai lyngba kane ka Sports Policy 2019 ki samla, ki kmie ki kpa ki ïoh jingkyrmen namar ki don bun ki thong ha kane ka policy kumno ban rah ban kyntiew ïa ki kam kilanmet hapoh ka jylla.
U la dap ruh da ka jingkmen ban lap ba ka jingïalehkai volleyball ka long kaba shongshit sha kine ki thaiñ bad u la kyntu ïa ki nongkitkam ban wan shakhmat ban ïa pynpaw pynroi ïa kane ka jylla. U la ong ruh ba kum u Working President ryngkat bad ki dkhot ka MSOA ki la ïa buddien ban ïoh ïa ka Sports Policy, ban pynkhih ïa ka Meghalaya Games kaba lai hadien 16 snem bad kaba saw ha u 2022 bad khamtam dan shen ïa ka 2nd North East Games ha u 2022. U la ong ba ha ka Meghalaya Games ka ban sa wan ka volleyball ka dei ban long kawei na ki jingïalehkai kiba dei ban rung namar kane ka sap la i dei ban rah ïa kane shakhmat.
Ha kawei pat ka liang u la bah Kharshi-ïing u la ong ba mynta lyngba ka policy, ka sorkar ka la pynbna bad kyntiew ïa ka song pisa ne ka cash award kaba la don ha ka policy na ka T. 7500 sha ka T. 60,000 tyngka ïa ki samla kiba jop takma ksiar kum shibynta ban pynshlur ïa ki samla. U la ong ruh ba lyngba ka policy kaba la pynmih ka sorkar mynta naduh 1 tarik Kyllalyngkot, 2023 la sdang ka scholarship kaba shisnem kaba T. 7000 takma ksiar, T. 6000 takma rupa, bad T. 5000 takma rnong man u bnai na ka bynta shisnem na ka bynta ki samla kiba jop ha ka jylla bad ka NE.
U ïathuh kumtei namar u ong ba ki dang bun ki kam bad ki bynta kiba kin dang hap kyntiew ïa ka kam ïalehkai naduh ki jaka ïalehkai, ki jingkyrshan ïa ki samla, ki association bad khamtam ban thawlad ban don ïa ki nonghikai (coaches) ha kiba bun ki jingïalehkai hapoh ka jylla. U la ong ba ka policy ka thew ruh kumno ba man ki skul ki dei ban don ruh ki Physical Education Teachers bad ki Coaches kiba la shai pyntbit. U la pynpaw ba ka sports policy ka kdew ruh halor ka ‘Talent Identification Program’ ïa kaba la sdang biang ha u ‘Naitung 2022 ha kaba la test kumba 4600 ngut bad na kine la jied kumba 200 ngut kiba la leh bha ha ki saw tylli ki test bad ïa kine 200 ngut ka tnad ka kam ïalehkai bad ka Meghalaya State Olympic Association (MSOA) ki la pynkhreh ïa ki jinghikai kiba kyrpang ki ban sa sdang shen kum shibynta ban nangrah ïa ka sap jong kine ki samla.
Namarkata, u la kyntu jur ïa ki nongkitkam jong ka SWKHD Volleyball Association ban wan shakhmat bad ïatreilang bad ka MSOA ban pynpaw ïa kane ka jingïalehkai kaba shongshit bha ha baroh kawei ka jylla.
Ka kynhun kaba la rah ïa ka nam jop ka dei ka Sarin SC ha kaba ka la ïoh rah ïa ka song pisa ka ba T. 25 hajar ryngkat ka khusnam.
Ha shwa ban pynkut ïa kane ka jingïalehkai Volleyball la ïoh ban pynlong ka jingïalang ba lyngkot ba la pynïaid da u bah Elevenson Wanniang, President jong ka SWKHDVA ha ryngkat da ka jingïadonlang ki nongkitkam jong ka SWKHDVA, ki ‘riew rangbah ha ryngkat ki paidbah kiba la wan pynshit pynshngaiñ.
