Nongstoiñ, K’lyngkot 22: Ka Hill State People Democratic Party ha ka taiew ba la lah, ka la pyllait paidbah ïa ka almanak (Calendar) ha ophis treikam jong ka seng kaba don ha Upper New Nongstoiñ.
Ïa kane ka Almanak jong ka party la ïoh ban pyllait paidbah da u Bah T.Lyngdoh President jong ka HSPDP Nongstoiñ Area Unit ha ryngkat ka jingdonlang kiwei de ki nongïalam ba kynthup ïa u Bah Nicolas Marweiñ bad kiwei kiwei ki nongkitkam ka party.
Ha kane ka almanak jong ka party, la buh lang ruh ïa ka dur jong u kyrtong ka party u ban sa ïakhun ïa ka elekshon, kata u Bah Sanjied Kynsai Shangrit lem ruh bad ka dur jong u nongseng ïa ka party, u ba long ruh u riew khraw ka jaidbynriew bad u MLA barim ka Nongstoiñ (L) Maieit Hoping Stone Lyngdoh.
“Kan long ka jingsah jingkynmaw ïa I Maieit I ba la shakri kum ka dak ban pynsah jingkynmaw ïa u nongseng jong ka Party HSPDP. Kumjuh ban kyntiew ïa ka kam jngohkai pyrthei jong ka West Khasi Hills District lyngba ka dur ka ba la shon ha ka calendar.
“Ka HSPDP ka dei ka party kaba sei ïa ki kyrtong ki ban ïalam ïa ka jaitbynriew kum ki nongïalam, ym ki nong khaïi ki ban biang tang ïalade klet pat ïa ka Ri bad ka jaitbynriew. Ngi sngew sarong ban pyllait ïa kane ka almanak, namar kan long ruh kum ka lad ban pyntip sa phriang sha ka Nongstoiñ, ba ka HSPDP kam pat jah bad kan nym jah satia, namar kane ka party ka la noh synñiang shibun ïa ka jylla bad dei tang kane ka party kaba ieng ha ka nongrim haduh mynta katne”, u la ong.
U Samla Wellesley Lyngkhoi President Youth Wing ka party ha ka District, u la ong, “Ngim dei ym ai lad ïa kane ka party ban shu duh, lada ka long kumta ka ri ka la plie ïa ka jingkhang ïa ki kam sniew bad ka jingleh donbor kumba ka la jia kumba jia mynshwa ha kaba bun na ki samla ki rangbah ki longkmie ki la shu long langkñia ha ki heh pait. Katba kane ka party ka dang im ka dang long ka stieh ïada pyrshah ïa kita baroh”.
“Ngin pynkhlaiñ ïa ka pateng jong kane ka party wat ngi long ka party duk. Ngi sngew sarong namar u paidbah u ba kren, u sakhi ïa ka rukom synshar ka HSPDP khlem kynshew pisa ne bam ka pisa u paidbah. Kat kaba ka Party ka don ka theh khlem da thew shilliang ïano ïano ruh”, u la ong.
