K a Voice of the People Party (VPP) kawei na ki seng saiñ pyrthei kaba dang shu mih shen hapoh ka jylla hapoh ka jingïalam u Bah Ardenmiller Basaiawmoit kadei kawei na ki party kaba ki paidbah mynta ki la ïakren sharum shaneng la ka long ha ki dukan, ki lynti, hapoh kali bad khamtam eh ha ki rynsan social media da kaba pynpaw ba lehse dei tang kane ka party kaba thymmai kaba lah ban ai ka jingshakri kaba bha bad kaba paka tam ïa ka synshar ka khadar hapoh ka jylla.
Kumba ki nongïalam ba hakhmat jong kane ka party ba kynthup naduh u Bah Ardent Miller Basaiawmoit naduh ba ki la pynbna ïa kane ka parti thymmai ki la buh ka thong ban pynkylla dur ïa ka synshar ka khadar hapoh ka jylla da kaba rat diengkhong ïa ka jingshakri bym hok, ka jingbam sap bam pong bad kiwei kiwei kiba ki sorkar ki la dep ban ïaid lynti ban synshar ïa kane ka jylla ha ki 50 tylli tam ki snem. Ka lyer jong ka VPP ka la sdang ban beh naduh ba ka la pynlong ka jingïalang paidbah ha madan Polo ha ka jingpynbna jong ka ïa ki arngut ki kyrtong kiban ïakhun na ka parti ha ka elekshon MLA 2023 ba kynthup u Bah Adelbert Nongrum uba dei u MLA ka 17 North Shillong Constituency bad u Bah Mayborn Lyngdoh uban aireng na Pynthorumkhrah Constituency, ha kaba la sakhi ba da ki hajar ngut ki paidbah ki la tuid sha katei ka jingïalang.
Ka lyer jong ka VPP ka la sdang ruh ban beh khamtam hadien ba ka parti ka la pynbna ïa ka shap (symbol) jong ka parti da u ‘Prah’ ha ka jingïalang kaba la pynlong ha Smit kaba dei ka shap ha kaba ka parti kan sa ïakhun ha kane ka elekshon MLA kaban sa long ha ka 27 tarik Rymphang 2023. Hynrei kane ka jingbeh jong ka lyer jong ka VPP ka kham jur bha ha ki rynsan social media bad haduh katno eh ba ki paidbah ha baroh kawei ka jylla ki shanñiah ïa kane ka parti khamtam kaba dang dei ka parti kaba dang thymmai bad kiba bun ruh ki kyrtong kidei kiba dang thymmai.
Ka jingjied ïa ka sorkar kadei ha ngi ki paidbah da kiba kum kino ki nongmihkhmat ngi jied ban long ki nongïalam ban kren ïa ki jingeh khamtam hapoh ïing dorbar, ym tang ban peit ïa ka parti hynrei ban jied ïa ki briew la ki dei kiba nang ba stad lane ki bym nang bym stad ha ka liang ki aiñ hynrei kiba don pat ka jingkitkhlieh ban ïarap ha kiwei pat ki liang kiba lah ban long ki nongïada ïa ka jaidbynriew bad khamtam ïa ka longdien mandien jong ngi kiban wan.
Kane kadei ka juk kaba ki paidbah ki dei ban sngewthuh ba kano kano ka jingpynbiej shwa ka elekshon ka dei ka jingthied ïa ka hok jong ki bad kane ka long ruh kumba ki la shim ram shwa ka elekshon. Kumta ka jingbakla jong ki ban die ïa ka vote shwa ka elekshon ka long kumba ki la bynda ne ki la shimram na ka bynta ki san snem.
La sngewdei ruh ban kynthoh kylla ïa ki nongthep vote lada jia ba ki nongmihkhmat kim lah ban treikam bha lane kim lah ban ïasaid bha ha Iing Dorbar. Ka long ka jingsngewsarong ïa ka constituency lada jia ba ki nongmihkhmat ki lah ban treibah bad khamtam ban ïasaid ïa ki ishu jong ka thain lane jong ka jylla ha Jaidbynriew. Kane kan long ruh markhongpong lada jia ba ki nongmihkhmat jong kato ka constituency kim lah ban trei bha.
Kadei ruh ka jingshisha ba ha ki khyndiat bnai shwa ka elekshon ki nongleit ai jingïarap kynthup ki nongsngewlem ki bun bha khamtam eh ha ki jaka ba don ki jingjia ba sngewsih ne ïapbriew. Dei ha kum kitei ki jingjia ba ki kyrtong ki ïohlad ban ïoh ïa kynduh briew lane pynithuh ba ki dei ki kyrtong ba thmu ban aireng. Teng teng i thamula ruh ba don ki khep ba lai ne sawngut ki kyrtong ki kynduh lang ha kawei ka jaka ba don kum kitei ki jingjia. Lehse na ka bynta kiba kham duna ka ïoh ka kot ka la long ka jingkyrkhu kaba khraw haba ki nongwan leh isynei bad ki nongnoh synñiang ki bun. Hynrei kaba sah mynta ka shong satang ha ki paidbah ba da kano ka sorkar ban wanrah hapoh ka jylla la ka long ka sorkar khleh khaw lang lane ka sorkar kaban synshar marwei ka shong ha ka jingstad ki paidbah.
