Shillong, Nailur 26: Ka Shillong Law College ha ka sngi Palei ka la rakhe ïa ka jingdap kaba 60 snem ha kaba ha kane ka prokram la wan ban long kongsan da u Lat ka jylla u CH Vijayashankar ha ka jingdonlang ki khynnah pule kane ka College, ki nonghikai bad kumjuh ruh principal kane ka jaka pule aiñ ba kynthup ruh ia ki samla pule barim kane ka jaka pule.
Haba kren kum u kongsan na ka liang jong u Lat ka jylla u la pynshlur ïa ki samla pule ba kin kit khia ha kaba ïadei bad kane ka subjek kaba long kaba kongsan bha na ka bynta ka jingim jong ha ka pule puthi. U la ong ba ha kane ka juk kaba mynta ka donkam bha ïa ki samla pule ban pule ïa ka kam aiñ bad namar kata u la pynshlur ïa ki ban pule bha ha kane ka subjek.
“Nalor ba kane ka juk kaba mynta kane ka jait jingpule ka long kaba kongsan, kumta nga pynshlur ïa ki samla pule ba kin pynleit jingmut bha ha kane jait jingpule naba ka long kaba donkam bha ïa ki samla pule bad ki nongshong shnong ba kin tip shaphang ka aiñ,” ong u Lat ka jylla.
Ha kane ka sngi ki la don bun ki prokram kiba la shim bynta da ki samla pule kaba la pynshong shit ïa kane ka jingrakhe ïa ka jingdap kaba 60 snem jong ka sngi seng ïa kane ka jaka pule.
Ha kane ka sngi nalor u Lat la donlang u Justice H.S. Thangkiew, High Court ka Meghalaya; Justice W. Deingdoh, High Court ka Meghalaya; Justice. B. Bhatacharjee, Additional Judge, High Court ka Meghalaya; u Bah D.P Wahlang, Chief Secretary, Government of Meghalaya; ki dkhot ka governing body, ka Shillong Law College; u Bah Brightstarwell Marbaniang, MLA; Pynïaid Singh Syiem, u CEM KHADC bad kiwei kiwei.
