Shillong, Nailur 26: Katkum ka kyrwoh khubor ba la ïoh na ki bor pynïaid jong ka NEIGRIHMS la ong ba kane ka jaka sumar ka la pynlong ïa ka jingïakob shna tiar na ki mar ba la bret (Waste to Art), kaba la dei uwei na ki païa jong ka “Swachhata Mein Jan Bhaagidari” ka Swachhta Hi Seva 2024 campaign, ba la pyllait paidbah da u Myntri Rangbahduh ka ri u Narendra Modi.
Ha kane ka prokram ki nongtrei bad ki bahaïing ba hasem jong ki nongtrei ka NEIGRIHMS kila pyni ïa la ka sap ka phong jong ki lyngba ka jingshna bapher bapher na ki tiar kiba la bret na hospital bad na la ïing.
Ka NEIGRIHMS ka la ïatreilang ruh bad ka IHM Shillong ban wanrah ïa ka jingkylla lyngba ka jingpynsaphriang ïa ka khubor ban pyndonkam biang ïa ki ñiut ki ñier. Haduh 35 ngut ki volunteer na ka IHM kiba la ïashimbynta ha katei ka jingïakob kaba la pynbeit da ka NEIGRIHMS.
U Prof. (Dr.) Nalin Mehta, Director jong ka NEIGRIHMS ryngkat bad u Prof. (Dr) C. Daniala, Medical Superintendent ka NEIGRIHMS bad u Bah Shemphang Khonglah Lecturer, IHM, Shillong kila ai ïa ka jingïaroh ïa ka jingïashimbynta jong baroh kiba la pynlong ïa katei ka jingïakob kaba seisoh.
Ki la don 20 tylli ki model kiba la shna bad la pyni nam da ki kynhun kiba la ïashimbynta. U Heno P bad ka kynhun jong u ki la wan nyngkong, ka Daphishisha Khonglah bad ka kynhun jongka ka la wan baar bad ka Twinklestar Nongbri bad ka kynhun jong ka na IHM Shillong ki la wan balai.
