Shillong, Nailur 26: Katkum ka khubor ba la phah da ka seng Congress la ïathuh ba ka la ujor ejahar pyrshah ïa 3 ngut ki nongïalam ka BJP bad uwei u dkhot ka Shiv Sena halor ka jingkynnoh ba ki la byrngem ïa u nongïalam ka Liang Pyrshah (LoP) ha Lok Sabha, u Rahul Gandhi.
La ong ba ha ryngkat ki nongïalam na kiwei ki seng saiñ pyrthei, u president ka Manipur Congress, u Keisham Meghachandra Singh u la ujor da ka ejahar pyrshah ïa u Myntri Khynnah ka tnat Railways ka Sorkar Pdeng u Ravneet Singh Bittu, u nongïalam ka BJP na Delhi Tarvinder Singh Marwah bad u nongïalam ka Shiv Sena uba dei ruh u MLA u Sanjay Gaikwad bad u Myntri Sorkar Jylla Uttar Pradesh u Raghuraj Singh da kaba kynnoh ba kila don bynta ban jingpynshit ïa ki kam thombor pyrshah ïa u Rahul Gandhi.
Ha kaba ïadei bad kane haba ïakren bad ki lad pathai khubor, u president ka Manipur Congress u Keisham Meghachandra Singh u la ong, “Ngi la mudui da ka ejahar ïa ki jingbyrngem ba paw pyrthei jong ki nongïalam ka BJP bad ki paralok jong ka ban pynduh ne pynmynsaw ïa u Rahul Gandhi.”
Na ka liang u Keisham Meghachandra Singh u la ong ba ka jingbyrngem ïa u nongïalam ka Liang pyrshah ka dei ka jingma ïa ka synshar paidbah, ïa ki paidbah ka ri India, bad ka dei da ka jingthmu leh kam beaiñ.
U la ong, “Kam dei ban don ka jaka ïa ki nongïalam ba leh kam sniew ha India. U Myntri Rangbahduh ka ri u Narendra Modi u dei ban shim khia ïa kine ki nongïalam kiba leh ïa ki kam sniew da kaba ai jingbyrngem ban pynduh jait ïa u Rahul Gandhi.”
La ong ba ha ka ejahar ba ujor da u President ka Manipur Congress ka kdew ba kine ki kam jong ki nongïalam ki dei ki kam ba la thmu bad ba la pyrkhat bha ban pyntieng pynsmiej bad ka jingpyrshang ba thmu jong ki nongïalam ka BJP ne NDA ban thaw ïa ka jingshun, ka jingpynkheiñ ïa ka jingsuk, ban pynmih ïa ka jingleh donbor, ka jingpynïashun hapdeng ki paidbah bad u Nongïalam ka Liang pyrshah paidbah.
