Shillong, Nailar 08: Ka Seng Samla Mawkhar ha ka 8 tarik mynta u bnai, ka la rakhe ïa ka jingdap 25 snem hapdeng ka jingiphuh iphieng.
Lah ban kdew hangne ba ïa kane ka Seng Samla ka seng ha ka snem 1998 da ki nongïalam Samla ha katei ka snem ban tehsong lang ïa ki Samla bad ban btin lynti ïa ki ha kiba bun ki liang.
Ha kane ka sngi ba plie ïa ka jingrakhe u Bah Adelbert Nongrum, MLA North Shillong u la long u Kongsan bad u Bah Pynshngaiñ N. Syiem, MDC Mawkhar- Pynthorumkhrah, uba long ruh u Dy. CEM ka KHADC u la long u Symbud Kongsan.
Ha kane ka sngi la ïadonlang ruh u Bah Arwan Tariang, Rangbah Shnong, u Bah Ransom Sutnga,President ka Mawkhar Sports Club, ki dkhot ka EC jong ka Shnong, ki nongkitkam ka Seng Kynthei bad ki Samla ka Shnong.
Kum ka dak ka jingsdang ka jingrakhe la pynher ïa ka lama lai rong jong ka seng kaba dei da ka rong saw, rong lieh bad rong blue.
La ot ruh ïa u Cake Silver Jubili kum ka dak ka jingkmen ïa kane ka jingïaid lynti ha kine ki 25 snem.
Haba kren ha kane ka jingïalang u Bah Adelbert u la ai khublei ïa ka Seng Samla kaba la mih ban shakri ïa ka Shnong ka thaw bad ban ïalam lynti ïa ki samla bad khamtam eh ha kiba kum kine ki sngi ba jyllei bha ki jingdih ba sniew kum u drok,ka kyiad bad kiwei pat ki jingsniew ha ka imlang sahlang. U Bah Adelbert u la aiti ruh ia ka jingïarap pisa kaba 1 lak tyngka sha ka Mawkhar Sports Club.
U Bah Pynshgaiñ ha ka jingkren jong u, u la ong ba ki Samla ki don ka bynta kaba khraw ha ka shnong ka thaw bad dei ma ki ki ban sa shimti ïa ka jingsynshar khadar ha ki sngi kiba hadien. Hynrei u la ong pat ba ki Samla kidei ban ïatreilang bad ka Shnong khnang ba kan don ka jingïabeit ïaryntih ha ki kam shnong. U Bah Pynshngaiñ u la ai jingïarap ruh 25 jakar tyngka na ka bynta kane ka jingrakhe Jubili.
Ka prokram ba kham kyrpang ha kane ka jingrakhe kadei ka jingiaphylliew jingmut halor ka phang “Ka jingpynkupbor ïa ki Samla bad ka bynta ki lad pathai khubor ha kaban ai jingmut ïa ki paidbah”.
Ha kane ka jingïaphylliew jingmut la ïasim bynta da i Kong Rikynti Marweiñ jong ka kot Khubor Highland Post, Bah Powell Sohkhlet jong u Mawphor, Bah Bhabok Laloo jong u PCN bad Bah Rining Lyngdoh jong u Nongsaiñ Hima.
Ha kane ka jingrakhe ba la don lang ruh ki nongkitkam jong ka Seng Samlakiba mynta bad kiba mynshuwa, ki samla ka Shnong ki la ai ruh ïa ka jingrwai theme Song jong ka Seng kaba la thaw naduh arphew snem mynshuwa.
