Shillong, Nailar 8 : U Myntri ka tnad pule puthi ka jylla u Rakkam A Sangma mynta ka Sngi Ba ar u la ïathuh ba ka jingpynbha bad pynthymmai ïa ki ïing skul Lower Primary hapoh ka jylla ka la ïaid shaid shaid bad la khmih lynti ba yn lah ban pyndep ïa ki hapoh kine ki hynniew bnai ban wan.
U la ïathuh ïa kane ka jingpynbha bad pynthymmai ïa ki ïing skul kiba la jot la pra hapoh ka jylla la rai ban leh da u Myntri Rangbah ka jylla u Conrad K Sangma.
“ Ka sorkar ka kwah ban wanrah ka jingpynkylla kaba nadong shadong ha ka puthi puthi hapoh ka jylla.Mynta ka sorkar ka dang pynkhreh ban pynlong biang ïa ka jylla kawei na ki jylla ba tbit tam ka pule puthi hapoh ka ri” ong u Rakkam.
La ïathuh ba ki don palat 1000 tylli ki skul hapoh ka jylla kiba ka jingpynbha bad jingpynthymmai ka dang ïaid shakhmat. Ha ka jingleit jongu sha East Jaintia Hills District u Rakkam u la ïathuh ba u la shong bishar bniah bad ki ophisar ïa ka jinglong jingman ka pule puthi ha katei ka district. Ym tang bad ki ophisar hynrei u la ïamir jingmut ruh bad ki nonghikai.
U la ïathuh ba kane ka jingïalang ka long kaba seisoh bha namar nga la ïoh jingtip da lade ïa ki jingeh ba ki nonghikai ki ïa kynduh bad kumjuh ruh ki jingai jingmut kiei kiba dei ban leh ban jop ïa kine ki jingeh.
U la ïathuh ba u DC u la pyrshang katba lah ban kyntiew ïa ka pule puthi ha kane ka district bad dei na kata ka daw u la leh hi ban mang ïa ka pisa na ka bynta ka mission kaba la jer kyrteng ka “ Ka Lawei” kaba ïasyriem hi bad ka jingtip ïa ka bor digital.
Ka East Jaintia Hills ka dei ka district kaba nyngkong eh ban pynlong ïa kaba kum kane ka prokram. Kane ka long ka jingsdang kaba biang eh bad da ka jingkyrshan lang ki nonghikai bad ki kmie ki kpa, ki samla pule ki da sngewtynnad bad kmen bha ban ïoh jingpyntbit lyngba kane ka prokram Ka Lawei.
U la ïathuh ba ki don haduh 15 tylli ki skul kiba la ïoh ïa ki smart TV, ki kor digital ban ïoh hikai pyntbit ïa ki khynnah hapoh une u snem
