Ha u Modi pyntip u CM ba baroh ki pyrshah ïa ki ‘Un-represented Tribe’ ha ki District Council

Shillong, Nailar 08 : U Myntri Rangbah ka Jylla Conrad K Sangma hynne ka sngi u la pynsngew ha u Myntri Rangbahduh ka Ri, u Narendra Modi ba ki paidbah ka jylla kim pdiang satia ïa ki ‘Un-represented Tribe’ ban shah thung kum ki nongmihkhmat shu sieh ha ki District Council jong ka jylla.
“Ka sorkar jylla ka la rai ban pyrshah ïa kane ka jingthmu ai lad lang ïa kitei ki un-represented tribe hadien ka jingïasyllok lang ïa baroh, da kaba buh hakhmat ïa ka jingbym ïoh bynta lang mar kumjuh bad kiwei ki riewlum,” ong u Myntri Rangbah ha ka dorkhas.
Shuh shuh la kdew ruh ba ka Meghalaya nalor ba ka la don lypa haduh 17 tylli ki kynhun riewlum ka dang don pat sa 37 tylli ki sub-tribe.
Kumta la ong ba da ka jingtyrwa ban pynbun shuh shuh ïa ka jingdon ki MDC ha ki District Council, ka jingdon ki nongmihkhmat na ki tribe/sub-tribe ka la wanrah ka jingsngew kaba bun halor ka jingbym ïoh lang kumjuh ban shah thung kum ki MDC shu sieh ha ki district council.
Lyngba ka dorkhas la pynpaw ruh ba katei ka lah ban wanrah pynban ïa ka jingsngew ba ym ïoh lang mar kumjuh hapdeng ki kynhun riewlum bapher bapher bad ka lah ruh wat ban ktah ïa ka jinglong ïa tylli kaba ki ju long baroh shi katta.
Ha kawei pat ka liang la kdew ba kam don pat kano kano ka bhah ban pyndap da kino kino kiba la biang ka rta bad kam don ruh ka jingkhang ïa kino kino ki tribe/sub-tribe ha ka elekshon la long ban thep vote ne aireng. “Kumta hadien ka jingïasyllok kaba sani bad janai bha, ka sorkar Meghalaya ka la rai ban pyrshah ïa ka jingthung MDC shu sieh ïa ki un-represented tribe ha ki District Council,” ong ka dorkhas sha u Modi.
Ka dorkhas ka kdew ruh halor haba ïadei bad ka jingthung ïa ki MDC shu sieh ha Khasi Hills Autonomous District Council (KHADC) bad Autonomous District Council (GHADC), kata ba kin dei (1) ki riewshemphang lane kito ki khraw pyrkhat ba la ïoh ïa ka jingithuh da ka sorkar pdeng ne sorkar jylla ha ka liang ka pule puthi. (2) Kawei pat ka long ïa ki nongïalehkai ba la paw kiba la mihkhmat ïa ka jylla ha ki lympung ïakhun jong ka ri ne shabar ri ruh.
(3)Nangta la kdew ruh ïa ki longkmie ba la paw ha ka imlang sahlang kiba la shakri ïa ka jylla kum ki heh sorkar lane kum ki stad ain lane kum ki dkhot ka State Commission, Board lane kiwei kiwei ki bor treikam jongka sorkar kiba ïadei bad ki paidbah. Kumjuh ruh ïa ki nongtreikam lajong kiba la paw ha ka liang ka kam bad ka khaii pateng.
Haba ïadei pat bad ka Jaintia Hills Autonomous District Council (JHADC), ka jingjied ïa ki MDC shu sieh ka long kumjuh, kata iwei i dkhot na bynta ki longkmie ba la paw ha ka imlang sahlang bad kiwei pat na bynta ki bynta ki thup ba dang sah.
U Myntri Rangbah u la ïatai ruh ïa ka jingtyrwa ban kyntiew noh ïa ka jingdon ki MDC ha GHADC na ka 30 sha ka 42 ngut, ha kaba 36ngut kin dei kiban shu jied bad 6 ngut kiba shu thung. Ha KHADC pat na ka 30 sha ka 42 ngut hi, kata 36ngut kiba shu jied da u paidbah bad 4 ngut kiba shu thung katba ha JHADC pat na ka 30 sha ka 34 ngut ha kaba 30 kiban shu jied da u paidbah bad saw ngut pat kiban shu thung.
La kdew ruh ba na ka bynta ka JHADC, ka jingkyntiew ïa ka jingpynbun ïa ki MDC kadei ban long sha ka 32 ngut, kata katkum ka jingdon ki nongshong shnong lada ïa nujor bad ka KHADC bad GHADC.