Shillong, Nailar 08 : U Myntri ka Tnad Pule Puthi Rakkam A Sangma ha ka sngi Ba-ar ula pyntip ba ka jingsdang shim klass ba nyngkong (first academic session) jong ka Captain Williamson Sangma State University, kan long noh naduh u snem 2024.
“Mynta ngi dang pynkhreh ha ka ban thung ïa u Vice Chancellor, Pro Vice Chancellor bad kiwei kiwei” ong u Rakkam haba ïakren bad ki nongthoh khubor.
Ula pyntip ba ka Sorkar Jylla ka la rai ruh ban sa buh ïa ka Shillong Campus jong kane ka State University.
Ha u bnai Lber 2023, ka ïingdorbar Thaw Aiñ ka Jylla ka la ai jingmynjur ïa ka Captain Williamson Sangma State University (Amendment) Act, 2023, ban pynkylla ïa ka Captain Willianson Sangma Technical Unversity sha ka State University ba pura.
Ka jingthmu jong kane ka Act ka long ban don noh ïa la ka jong ka State University ka ban ai jingshakri ha ka liang ka pule ka dangle ba kynthup naduh ka higher bad technical education nalor ka lad ban leh research bad kiwei kiwei.
Halor ka jingeh ba mad da ki samla pule ban ïakhun ïa ka eksam CUET, u Rakkam ula ong ba ka Jylla kan sa ïoh sa kawei ka centre ha Jowai nalor ki lai tylli ki centre ba don mynta ba kynthup ïa 2 tylli ha Shillong bad kawei ka Tura.
