Shillong, Nailar, 08: Ka Catholic Association of Shillong (CAS) ha ka sngi Baar ka la phah ïa ka dorkhas sha ka President ka ri India ka Droupadi Murmu lyngba u Lat ka Jylla u Phagu Chauhan ha ka jingïakynduh ba kyrpang ha Raj Bhavan, Shillong.
Lyngba kane ka dorkhas ka CAS ka la kyntu ïa ka President jong ka ri India ban wanrah biang ïa ka shongsuk shongsaiñ ha ka Jylla Manipur.
Ïa kane ka kynhun la ïalam da u President u Bah J A Lyngdoh ryngkat ka jingdonlang jong u Vice Presient u Bah Ronnie V Lyngdoh, ka Kong Kiltiora Marbaniang, u Bah Richard Kahit, u General Secretary u Bah Barnabas Nongbah bad kiwei kiwei.
Ïa kane ka dorkhas la shim rai ha ka Silent Peace Rally ba la pynlong da ka Catholic Association of Shillong ha ka sngi Saitjaiñ jong ka taiew baladep ha nongbah Shillong ryngkat ka jingïatreilang bad ka Meghalaya Church Leaders Forum (MCLF) bad ka Khasi and Jaiñtia Christian Leaders Forum (KJCLF).
