Shillong, Rymphang 27 : Ka All India Trinamool Congress lane ka TMC ka la rai ban ym pynïeng kyrtong na ka Shillong Parliamentary Constituency ha kane ka election MP Lok Sabha ka ban long ha u bnai Iaiong ne Jymmang 2024.
U President ka TMC u bah Charles Pyngrope u la pyntip ïa kane sha ki nongïalam ka All India Trinamool Congress (AITC) ha Kolkata dang ha kine ki khyndiat sngi.
Ha kaba ïadei na ka bynta ka Tura Parliamentary Constituency ka TMC kan sa shim ïa ka rai tad haduh ba ka la dep ban lum jingtip na kylleng ka Constituency hapoh kane hi ka taiew.
Haba ïakren bad ki nongthoh khubor u bah Charles u la ong “Ka daw ba la shim ïa ka rai ban ym pynïakhun kyrtong na kane ka Shillong Seat ka dei hadien ba la lum jingkheiñ bad lap ba ka jingïoh vote jongka party ha ka election MLA kaba la dep ka duna palat bad kumta kan buh jingeh bha ïa ka party ban ïoh ïa ka jingjop wat la ka pynïeng kyrtong ruh”.
Ka TMC kum shi bynta ka jingïadon lang ha ka INDIA Block ka lah ban ai ka jingkyrshan ïaka Congress hangne ha ka Shillong Seat.
Ha kaba ïadei bad ka jingwan jong u nongïalam ka AITC u Derek O’Brien sha ka nongbah Shillong dang shen, u bah Charles u la ong “Kat kum ka jingai jingmut jong u ka long ba ka party ka dei ban pynïakhun kyrtong beit na Tura bad dei halor kane ngi la pan por ban lum jingtip shwa na baroh kawei ka constituency khnag ban sngewthuh la ka party ka dang ïoh ne em kajuh ka jingkyrshan kumba ïoh ha ka election MLA ba la dep”.
